Инвеститорите си ја повлекле добивката
Само што почна да расте нивото на странски инвестиции во земјава, годинава и во март се искачи на 207 милиони евра, во април инвестициите бележат намалување од 20,3 милиони евра. Заклучно со април странските инвестиции се стопиле на 186,8 милиони евра. Според последните податоци објавени на веб-страницата на Народна банка на Македонија, странските инвеститори што веќе работат во земјава во април дури 31,1 милион евра од остварената добивка ја повлекле во своите матични компании, односно не ја реинвестирале во земјава. Инаку, од вкупно 186,8 милиони евра вложени странски пари во Македонија во првите четири месеци од годинава,127 милиони евра отпаѓаат на акционерски капитал и на реинвестирана добивка, или свеж капитал што влегов во земјава. Над 16 милиони евра се побарувања, а 75,5 милиони евра се обврски на странските компании кон нивните мајки-фирми. Новата влада најавува дека годинава во земјава ќе влезат од 300 до 350 милиони евра странски капитал. А, ако не се случи нова светска криза или рецесија, тогаш приливот на инвестиции се очекува да расте во наредните четири години, а во 2015 година нивото на странски инвестиции да се искачи над 650 милиони евра.
Вкупно две милијарди евра странски инвестиции до 2015 години ветува новата влада предводена од ВМРО-ДПМНЕ во предлог-програмата што мандатарот Никола Груевски ја достави до Собранието. Минатите две години, 2009 и 2010, не беа многу оптимистички ако се гледа нивото на странски инвестиции. Во 2009 година беа регистрирани само 145 милиони евра странски инвестиции, а во 2010 г. 221 милион евра. За годинава владата најави подобри резултати и влез на неколку странски компании од автомобилската индустрија. Во слободната економска зона „Бунарџик“ засега работат „Џонсон контролс“ и „Џонсон Мети“, а во фаза на изградба се и фабрики на италијанската „Технохозе“, а неодамна почна да гради и американската компанија „Кемет електроникс“. (С.М.) |
