Јане Чаловски изложува во берлинската галерија „Жак Браницка“

„Опседнат простор“ е насловот на изложбата на македонскиот уметник Јане Чаловски што е отворена во галеријата „Жак Браницка“ во Берлин, а ќе биде поставена до 29 јануари 2011 година. Делото на Чаловски е инсталација составена од 74 цртежи и колажи и еден архитектонско-скулптурален објект. Вклучува и дополнителни дела, како видео и фотографии. Негова основа, всушност, е процесот на конципирање и артикулација на мастер-планот за Скопје, изработен од тимот на јапонскиот архитект Кензо Танге.

Централниот објект во инсталацијата е скулптурата со наслов „Опседнат простор (студија за архива)“, кој претставува модуларна структура во форма на складиште, кое служи како идеален објект за складирање на можните процеси и артефакти. Од структурален аспект, овој објект директно реферира на оригиналниот архитектонски модел на Кензо Танге, што моментно се чува во Музејот на град Скопје. Чаловски собира докази за процесот на дислоцирање и трансформации на различни наративи, внимателно испитувајќи ги расположливите архиви, но и приватните од тоа време, притоа додавајќи ја неговата уметничка интерпретација.

Овој проект е создаден за првата самостојна изложба на Јане Чаловски во берлинската галерија „Жак Браницка“ и го продолжува тековниот проект „Мастер план“, кој беше претставен на Европското биенале за современа уметност „Манифеста 7“ во 2008, како и на проектот „Книга 3 - Грешки“ за Турскиот павилјон на Венециското биенале во 2009 година. (К.Р.)