Жетвата задоцни, сега оди без проблеми

Жетвата е во полн ек и се одвива без проблеми. Иако почна со задоцнување, временските услови се поволни и овозможуваат комбајните непречено да ја вршат работата. Сепак, велат експертите, се' уште не може прецизно да се зборува за просечни приноси, зашто деновиве постојат услови за нестабилно време проследено со врнежи, ветер, а некаде и град.

„Високите дневни температури кон крајот на првата и почетокот на втората декада од месецов предизвикаа поинтензивно губење на вишокот влага во класот и губење на водата од почвата во површинскиот слој, што овозможи непречено влегување на земјоделската механизација“, објаснуваат агрометеоролозите.

Жетвата на јачменот и на есенската пченица годинава почна со многу големо задоцнување, за околу 20 дена, а во некои региони и повеќе. Ова се должи на исклучително влажната зима, големите количества врнежи во текот на пролетта и ниските температури на воздухот во еден подолг период, што го оневозможи нормалното зреење на зрното.

Јачменот интензивно се жнее речиси секаде, со исклучок на Малешевско-пијанечкиот регион и на одделни површини во прилепскиот дел на Пелагонија, каде што допрва почна.

Според Управата за хидрометеоролошки работи, приносите се задоволителни на површините што не беа поплавени во текот на есента и зимата и не претрпеа поголеми оштетувања од временските непогоди. (МИА)