Трет концерт на Влатко Стефановски и Стефан Миленковиќ во Белград

Бидејќи билетите за вториот концерт на Влатко Стефановски и Стефан Миленковиќ во белградскиот „Сава центар“ речиси се распродадени, организаторите се одлучија да додадат уште еден настап, кој ќе биде одржан на 27 декември.

„Интересот навистина е незапаметен“, велат од „Белградска културна мрежа“, која е продуцент на концертите. Првите два концерта се распродадени речиси за неколку дена, а, без сомнение, така ќе биде и со третиот концерт. Се разбира, тоа не зачудува, зашто станува збор за нешто многу повеќе од обичен концерт. Влатко и Стефан на големо го подготвуваат репертоарот и ќе ни приредат навистина фантастични незаборавни вечери. Инаку, третиот концерт воедно ќе биде и финален за оваа година - велат белградските организатори за српскиот дневен весник „Блиц“.

Настапите на Влатко Стефановски и Стефан Миленковиќ ќе бидат одржани на 22, 23 и 27 декември во Големата сала на „Сава центар“, а влезниците чинат од 15 до 25 евра.