Уапсен прилепчанецот што стрелаше во свој сограѓанин

За пукотоницата што се случи во понеделникот попладне, а во која со тешки повреди се здоби прилепчанецот Дарко Ирене (29) со прекар Мафијата, полицијата го осомничува 31-годишниот Василчо Димески од Прилеп. Осомничениот, кој извесно време беше во бегство, од завчера е во рацете на полицијата.

„Полицијата го реконструира случајот. Се' се случило околу 16,50 часот на булеварот во центарот на Прилеп кога 29-годишниот Дарко го паркирал автомобилот марка „алфа ромео“ и потоа се упатил кон „голфот“ со бугарска регистрација, паркиран во непосредна близина. Одеднаш од голфот излегол Димески со пиштол во раката и испукал седум куршуми во Дарко. Иако тешко ранет, тој успеал да влезе во такси и бил префрлен во Градската болница“, појасни портпаролот Ѓоко Стрезовски.

Според Стрезовски, совозачот на повредениот Дарко се спасил од куршумите бегајќи со возилото „голф“.

Пријавениот Димески го фрлил пиштолот в река, но по направена парафинска ракавица, било утврдено дека тој пукал во Мафијата, за кого од Градската болница потврдуваат дека бил опериран и е надвор од животна опасност.

Како можен мотив за обид за уби��тво, според осомничениот, биле нерасчистени должничко-доверителски односи. Имено, Димески и Ирене се запознале пред две години и заедно биле во Германија, каде што сега ранетиот бил во затвор, наводно, поради растурање дрога, а во изминатиов период тој бил на привремена работа во САД.

Од полицијата велат дека по целосното расчистување и документирање на случајот, ќе следува соодветна кривична пријава. (Х.Р.)