Нашинците праќаат дома се' помалку пари

Приливите од приватните трансфери се помали поради падот на откупот на ефективата

Александрија Стевковска

Нашите иселеници во странство испраќаат многу помалку пари од очекуваното. Вака заклучила Народната банка на Македонија, која поради тоа направила и надолна корекција на нето-приливите од приватните трансфери во најновата ревизија на макроекономските проекции за 2011 година. Имено, нето-приливите од приватните трансфери оствариле понегативни движења поради повисокиот годишен пад на нето-откупот на ефектива од 12,2 отсто наспроти 9,5 отсто според априлската проекција. Освен во овој сегмент, каде што се бележи негативен тренд, останатите делови што учествуваат во креирањето на поволниот економски амбиент покажуваат позитивни поместувања, што ги крена очекувањата за раст на БДП и за пад на инфлацијата до крајот на годинава.

„Врз основа на макроекономските движења, за 2011 година се очекува повисок раст на економската активност во однос на очекувањата и достигнување на бруто домашниот производ од 3,5 отсто наспроти претходните очекувања за раст од 3 отсто. Ризиците околу растот се во надолна насока и се поврзани, пред се', со должничката криза кај периферните земји од еврозоната, со потенцијални последици за странската побарувачка, извозот, инвестициите и очекувањата. Се очекува за цела 2011 година инфлацијата да биде 4,5 отсто со тенденција на натамошен пад“, објави вчера гувернерот на Народната банка, Димитар Богов.

На вчерашната седница на Советот на НБМ било заклучено дека поволните макроекономски движења ќе продолжат, а основната каматна стапка ќе остане непроменета.

„Барањата на банките за намалување на задолжителната резерва и за корекција на коефициентите за ликвидност се разгледуваат. Најверојатно, ќе одиме со корекција на билансните ставки што ќе им ослободи на банките одредена ликвидност, а можноста за намалување на задолжителната резерва се' уште ќе ја разгледуваме“, додаде Богов.

Движењата во платниот биланс се во рамки на очекувањата. „Во второто тримесечје на 2011 година се проценува дека дефицитот на тековната сметка ќе изнесува 0,9 отсто од БДП (1 отсто во априлската проекција), во услови на позитивни движења кај трговското салдо, кај услугите и кај доходот. Истовремено, се очекува дека капиталните нето приливи ќе бидат пониски од априлската проекција и дека ќе изнесуваат 0,04 отсто од БДП, главно поради пониските странски директни инвестиции, помало нето-задолжување во странство, како и зголемена побарувачка за девизни средства на населението од банкарскиот сектор“, информираше Богов.

Се очекува дека дефицитот на тековната сметка на билансот на плаќања, до крајот на 2011 година, ќе изнесува 5,5 отсто од БДП, што претставува надолна корекција во однос на априлските очекувања.

Се планира девизните резерви до крајот на 2011 година да остварат посилен пораст со што нивното ниво и понатаму ќе обезбеди покривање на четиримесечниот увоз на стоки и услуги од наредната година.

„Ризиците околу проектираниот монетарен и кредитен раст, главно, се поврзани со темпото на заздравување на реалната економија и оцената на ризиците од банките, а како дополнителен фактор на ризик и натаму останува динамиката на инфлацијата во следниот период“, објасни Богов.

Советот на Народна банка го разгледал и го усвоил извештајот за банкарскиот систем во првото тримесечје од 2011 година. Заклучено е дека вкупната актива на банкарскиот систем продолжила да се зголемува и дека ќе оствари годишна стапка на раст од 14 отсто. Кредитната активност на банките пораснала и тоа со побрзо темпо во споредба со претходното тримесечје. Учеството на нефункционалните кредити во вкупните кредити минимално се зголемило, а исто така се зголеми и учеството на кредитната изложеност во поризичните категории на пласмани. Од друга страна, на годишно ниво, овие два показатела бележат подобрување, преку зголемување на покриеноста на изложеноста од страна на банките со издвоената исправка на вредноста и посебна резерва.

Показателите за солвентноста и капитализираноста на банкарскиот систем забележале зголемување.

Во првите три месеци од 2011 година, поради намалените каматни приходи и зголемените оперативни трошоци кај одделни банки, финансискиот резултат на ниво на банкарскиот систем е негативен и изнесува од 80,5 милиони денари. Веќе во април 2011 година, банкарскиот систем прикажа добивка од 111 милиони денари.