Домашната пченица на диво се носи во Албанија

Битола - Македонското лебно жито на диво заминува за Албанија. Додека производителите и мелничарите спорат колкава да биде цената за килограм пченица од годинешната реколта, прекупци од соседна Албанија ја откупуваат нашата пченица по 13 денари за килограм и тоа директно од нивите. Мелничарите реагираат, барајќи државата да ја спречи сивата економија. Дел од домашните производители на пченица, пак, не помислуваат да го продадат родот ниту за 15 денари по килограм, а очекуваат повисока цена и на светската берза.

Драги Мицковски, производител од Пелагонија, вели дека годинава не продал ниту килограм од родот, бидејќи чека зголемување на цената. Во исто време државата веќе најави дека овој месец ќе откупува пченица за стоковните резерви.

„Додека траат преговорите меѓу земјоделците и мелничарите околу тоа колкава да биде цената на пченицата, секој ден од Албанија доаѓаат камиони и го откупуваат родот. Дирекно од нива носат по 12-13 тони пченица на ден. Парите им ги исплаќаат на рака на земјоделците, без да се платат никакви давачки кон државата. Ова е работа на инспекциите кои треба да излезат на терен побрзо“, вели Мицковски, кој е претставник на здружението „Аграр“ од селото Загоране.

Големите производители на пченица од Пелагонија засега немаат намера да го продаваат родот по 13 денари за килограм, па голем дел од нив веќе ја складирале по државните силоси и чекаат државата да ја откупи за државните резерви по повисока цена.

И според мелничарите, проблем со откупот на пченицата годинава прави сивата економија.

„Производителите сакаат на диво да ја продаваат пченицата, да земаат по 13 денари за килограм. Камиони од цела Македонија одат на нива, директно го креваат родот и им даваат пари на рака. Тоа значи дека производителот не сака да плаќа данок на приход“, вели Благој Стојчев сопственик на „Млин Стојчев“.

За надминување на состојбите и земјоделците и мелничарите бараат помош од државата. Министерот за земјоделство Љупчо Димовски смета дека се доближиле ставовите меѓу двете страни.

„Веќе можеме да разговараме за откупна цена на пченицата од 13 до 15 денари за килограм. Ако е така, мислам дека таа е добра за земјоделците. Но, и двете страни треба да бидат задоволни, со оглед на тоа што берзанската цена на пченицата треба да бележи нагорен раст“, смета министерот Димовски.

Тој потврдува дека уште овој месец Владата ќе објави јавен оглас за пополнување на државните стокови резерви со пченица. Со тоа, како што вели, директно ќе се влијае на откупната цена. (А.Б.)