Колера коси низ Хаити

Се стравува дека болеста веќе одзеде над 200 животи

ПОРТ-О-ПРЕНС - Пет случаи на колера се регистрирани во главниот град на Хаити, Порт-о-Пренс, соопштија ОН, додека болеста однесе над 200 животи. Новите случаи биле заразени во главната зона каде што се појави болеста - регионот Артибонит, а потоа отпатувале во главниот град, каде што се разболеле. Тоа значи дека Порт-о-Пренс „не е нова локација на инфекција“, забележа претставничка на ОН. Претходно, претставничката на ОН изјави дека изгледите за колера во градот, каде што повеќе од еден милион преживеани во јануарскиот земјотрес живеат во шатори, се „застрашувачки“. Луѓето од камповите се многу чувствителни на цревна инфекција, предизвикана од бактерии што се пренесуваат преку заразена вода или храна.

Досега се пријавени 2.674 случаи на оваа болест, а здравствените претставници се обидуваат да го спречат ширењето на колера во Артибонит и во Сентрал Плато. Тие истакнаа дека ги зголемуваат мерките за спречување на болеста, како и надзорот во камповите од шатори, а испратиле и медицински екипи во северниот дел за да ги лекуваат заразените, со цел тие да не патуваат во главниот град по помош.

Официјалните претставници, исто така, ги идентификуваат местата во Порт-о-Пренс каде што ќе бидат полски болниците, а во кои пациентите би можеле да се лекуваат изолирани од другите луѓе. „Ако во Порт-о-Пренс има случаи на колера, единствен начин е тие да се изолираат. Очигледно, сега апсолутно најголема грижа е да се спречи ширењето на болеста во градот“, додаде таа.

Во саботата, претседателот на добротворната организација со седиште во САД, Управно собрание за храна за сиромашните, предупреди дека властите на Хаити и меѓународните организации не реагирале доволно брзо за да го спречат ширењето на болеста. „Веќе минаа над 72 часа. Нема безбедносен кордон“, рече Даниел Рузиер за Ројтерс. „Ако болните имаа соодветна здравствена заштита таму каде што се наоѓаа, не ќе требаше да доаѓаат во овој хаотичен град. Се' уште има време да се реагира. Доколку се преземат соодветни мерки, мислам дека ќе можеме да го ограничиме бројот на луѓето што умираат“, смета тој.

Во меѓувреме, официјални извори потврдија дека 194 лица починале од колера во Артибонит, а уште 14 во Сентрал Плато. (Би-Би-Си)