Јавноста исклучена од судењето за протестите на плоштад

Јавноста вчера беше исклучена од следењето на судскиот процес на тројцата организатори на протестот против изградбата на црква на плоштадот „Македонија“ во Скопје, кога се случија инцидентите. Со образложение дека за следење на процесот е потребна писмена дозвола од претседателката на Основниот суд Скопје 1, судијката Љиљана Петровска вчера не дозволи присуство на новинари во судницата. За судијката, освен писмена дозвола, постојат и други „објективни причини“, како што е мала судница и немање редарска служба во Одделот за прекршоци.

Но, иако јавноста беше исклучена од следењето на судскиот процес, кој се води против лицата Александар Ивановски, Никола Наумовски и Билјана Димитриева, обвинети според Законот за јавни собири, неофицијално дознаваме дека вчера биле распрашани неколкумина сведоци, а се гледал и видеоматеријал снимен на денот на одржувањето на протестот.

Тројцата спомнати се товарат дека не го прекинале јавниот собир одржан на 28 март годинава и покрај тоа што веќе имало нарушување на јавниот ред и мир, иако оние кои протестираа против изградба на црква на централниот скопски плоштад беа цел на физички напад од поддржувачите на идејата за изградба на верски објект во строгиот центар. (Љ.С.)