Напад со автомобил-бомба врз конвој на НАТО во Авганистан
КАНДАХАР - Бомбаш-самоубиец вчера со автомобил-бомба влезе во конвојот на НАТО во јужниот дел на Авганистан притоа убивајќи двајца авганистански цивили и повредувајќи тројца војници од Алијансата, изјавија од полицијата. Нападот се случил на патот кон градот Спин Болдак, кој се протега на границата со Пакистан. Од местото на инцидентот се издигнуваше чад, а војници ја затворија областа, соопшти полицијата. Во друг самоубиствен напад во југоисточната провинција Кост, уште еден бомбаш влета со автомобилот во владин објект, изјави гувернерот на провинцијата Арсалах Џамал. Тој не откри други детали.
Нападите се случија во услови на се' поголемо насилство во Авганистан од 2006 година кога соборените Талибанци почнаа да ги прегрупираат своите сили. Талибанците кои ја имаат поддршката од Ал Каеда ветија дека годинава ќе се фокусираат на повеќе самоубиствени напади како дел од востанието против власта и странските сили стационирани во земјата. Минатата година во Авганистан се случија повеќе од 140 самоубиствени напади, имитација на востанието во Ирак, а досега годинава бројот на таквите напади е многу поголем во споредба со истиот период лани. Најголем број од жртвите на самоубиствените напади се цивили. (Ројтерс) |
