Организиран криминал ќе ја води истрагата за штипскиот
секс-скандал

Трансферот на случајот со проституирање на две малолетнички од Штип е официјализиран. Во четвртокот попладнето Јавното обвинителство донело одлука со која целиот случај се пренесува во надлежност на Одделот за организиран криминал на скопскиот Кривичен суд, каде што ќе се води натамошната истрага.

Она што засега е извесно е дека постапката и натаму ќе се однесува на девет лица за кои во Основниот суд во Штип се водеше кривична истражна постапка. Во судот во Штип за осомничените се водеа три паралелни истраги, но може да се очекува тие да бидат сублимирани во една. Не се исклучува можноста со истрагата во Скопје да бидат опфатени и други лица. Двете девојки ќе одговараат за подведување малолетнички, а наставникот за обесчестување со злоупотреба на службената положба и сексуална злоупотреба на малолетно лице кое не наполнило 14 години. Злоупотребуваните девојчиња се сместени во шелтер-центар надвор од Штип, а како што дознаваме, тие веќе биле распитани за случајот.

Скандалот со проституирањето на две малолетнички од Штип беше обелоденет на почетокот на септември. Девојчињата биле продавани на мажи на возраст меѓу 30 и 65 години, од Штип, Куманово, Кочани и од Струмица. За услугата тие на макроата им плаќале од 1.000 до 5.000 денари. (Љ.С.)