Валтер Карвалјо ја прими „Златна камера 300“ за животно дело
Светскиот кинематограф од Бразил Валтер Карвалјо е добитник на наградата „Златна камера 300“ за животно дело која ја доделува Интернационалниот фестивал на филмска камера „Браќа Манаки“. Наградата на Карвалјо, за неговиот придонес во светската филмска уметност, му беше доделена прексиноќа од страна на директорот на фестивалот Томи Салковски. „Доделувањето на наградата ’Златна камера 300’ за животно дело ја вреднуваме како најважен дел од нашиот фестивал“, рече Салковски, кој потсети дека Карвалјо е најмлад и трикратен победник на „Браќа Манаки“.
„Оваа награда е најзначајна награда во мојот живот и прави да се чувствувам како да почнувам со мојата работа од почеток. Наградите носат многу задачи и одговорности“, рече Карвалјо.
Валтер Карвалјо, кој работи и како сценарист, режисер, фотограф и продуцент, има создадено над 60 играни филма и освоено над 40 престижни награди. Добитник е на „Златната мечка“ во Берлин во 1998 година за фотографијата во филмот „Туѓа земја“. (К.Р.)
|
