Се фаќа приклучок кон ЈУ-железницата

Откако претходно не и' придаваа големо значење, македонските власти сега се обидуваат да фатат приклучок кон заедничката ЈУ-железница.

„Вчера, конечно, се завршени преговорите и, колку што дознав, во рок од еден месец треба да се потпише договор за ’Македонски железници‘ да стане дел од алијансата ’Карго 10‘“, изјави премиерот Никола Груевски.

„Би сакал да истакнам дека ова добро се заврши, како што посакувавме. По извесен период на преговори, МЖ беше поканета да влезе во оваа група, така што тоа ќе биде придобивка за нашите железници и влегуваме во една група што има сериозни заеднички проекти за движење напред на железниците од овој регион“, рече Груевски.

Како што вчера пренесе Хина, „Хрватски железници“ во вторник попладне издала соопштение во кое се наведува дека според потпишаното и договореното во Белград, во Загреб бил одржан состанок на претставниците на идната алијанса „Карго 10“.

На состанокот присуствувале ХЖ „Карго“, „Словенечки железници“, „Железница на Србија“, „Железница на Република Српска“, а прв пат учествуваше и претставник на „Македонски железници-Транспорт“, директорот Оливер Дерковски, кој изрази желба и македонската компанија да се вклучи во алијансата „Карго 10“.

На состанокот била донесена одлука дека се прифаќа пристапувањето на „Македонски железници“ кон Алијансата, што е во согласност со договорот од Опатија, кој беше потпишан оваа пролет, а договорот за приклучувањето ќе се потпише, најверојатно, пред поаѓањето на првиот воз на алијансата што, според планираното, треба да се случи во почетокот од октомври.

Во соопштението на „Хрватски железници“ се додава дека на состанокот во Загреб било нагласено дека групата е отворена за нови членки, кои ќе можат да се приклучат по склучувањето договор за пристапување.

Основа цел на алијансата и на новата железничка компанија ќе биде оптимизацијата на деловниот процес во организација на товарниот железнички сообраќај. (Ек.Р.)