Последен ден за дворовите

Денеска истекува рокот за поднесување барање за откуп на дворното место по цена од едно евро по квадратен метар. Засега нема потврда дека би можело да има ново продолжение, иако неофицијално се зборува дека сепак, рокот ќе биде пролонгиран за два месеца. Но, според министерот за финансии, Зоран Ставрески конечна одлука ќе биде донесена на некоја од наредните владини седници, откако прво ќе се направи анализа за фактичката состојба и ќе се утврди колку граѓани успеале, а колку не успеале да поднесат барање.

Интересот за откуп на дворовите кулминираше во последниве денови. Вчера биле поднесени 11.292 барања. Според Управата за имотно-правни работи до вчера биле поднесени вкупно 73.881 барања. Управата и денеска ќе работи до 21 часот, се' со цел да им овозможи на што поголем број граѓани да поднесат барање.

Според надлежните, државата не очекува да собере многу пари од продажбата на дворното место. Проценка е дека во буџетот би се слеале од 200 до 300 милиони денари. (Б.А.)