Комичната опера „Љубовен напиток“ со гости од Србија

Утре со почеток во 20 часот на сцената на Македонската опера и балет ќе биде изведена комичната опера „Љубовен напиток“ од Гаетано Доницети под диригентство на Саша Николовски-Ѓумар. Режијата е на Гордан Драговиќ-Черногорски од Србија. Улогите ги толкуваат: Ѓорѓи Цуцковски (Неморино), Олгица Милевска (Адина), Ристе Велков (Белкоре), Владимир Саздовски (д-р Дулкамара) и Катерина Бошковска (Џанета).

Сценографијата е на Марија Ветероска, костимите ги дизајнираше Љупка Арсовска, додека автор на кореографијата е Тања Поповиќ од Србија.

Операта „Љубовен напиток“ ја создал авторот во 1831 година, а својата премиерна изведба ќе ја доживее една година подоцна во театарот во Милано. Во 1840 година Вагнер ќе направи од оваа опера аранжман за соло-пијано. Дејството се случува во едно мало италијанско село кон крајот на 18 век.