Насловна

Во САД невработеноста се зголеми на 9,2 процента

Вашингтон - Стапката на невработеност во САД минатиот месец се зголеми на 9,2 процента, а вработувањата се речиси стопирани, имајќи предвид дека е забележано најмало зголемување на бројот на вработените во изминатите девет месеца, соопшти американското Министерство за труд. Во јуни бројот на вработените е зголемен за само 18 илјади, што е бројка значително помала од очекуваната. Бројот на невработените Американци во јуни се зголемил за речиси 175 илјади и се искачил на 14,1 милион.

Државниот сектор минатиот месец го намали бројот на вработените за 39 илјади, додека во изминатите осум месеци бројот на работните места во тој сектор е намален за дури 238 илјади. Минатомесечната стапка на невработеност е за 0,1 процент поголема во однос на мај и е на највисоко ниво од декември 2010 година. Две години откако официјално заврши рецесијата на најголемото стопанство во светот, компаниите вработуваат се' помалку лица и покрај рекордните резерви на готовина и добрата заработувачка. Претседателот Барак Обама изјави дека новите бројки го потврдуваат тоа што веќе многумина го знаат, дека САД ��маат пред себе долг пат пред да успеат да направат пресврт во економската состојба. Обама истакна дека предизвиците со кои е соочено стопанството на САД во изминатите два месеца, меѓу кои се растот на цените на бензините и природната катастрофа во Јапонија, која доведе до нарушување во снабдувањето на американскиот пазар, не се создадени преку ноќ, па поради тоа и не можат да бидат решени преку ноќ. (МИА)