Климентовата награда требаше да ја добијам порано

Академик Томе Серафимовски смета дека наградата ја имаат добиено личности што не ја заслужиле

Вчера во центарот на Скопје беше откриен споменик на св. Климент Охридски, поставен на истоимениот булевар, во непосредна близина на истоимената црква, дело на скулпторот академик Томе Серафимовски, кој е и годинешен добитник на Светиклиментовата награда.

Серафимовски завчера во НУБ „Св. Климент Охридски“ каде што скулптурата е поставена во гипс, се осврна на наградата потенцирајќи дека нејзиниот наслов многу го весели, но дека не е воодушевен со нејзиното доделување.

„Долго размислував дали да дадам согласност за поддршка да бидам предложен и да ја примам оваа награда, затоа што сметам дека ја имаат добиено личности што ни оддалеку ја немаат заслужено, ја добиле 10-15 години пред мене, а јас точно 40 години работам преродба и духовност во Македонија. Пред 23 години открив споменик висок шест метри на светите браќа Кирил и Методиј покрај прекрасното Охридско Езеро, во центарот на Белград открив целосно нов нивни споменик, кој е речиси 80 см помал од охридскиот, но голем 5 метри. Пред 40 години, во центарот на Тетово го открив споменикот на Кирил Пејчиновиќ. Работев духовност и преродба точно 40 години и сега на возраст од 76 години ја добивам Климентовата награда, која, веројатно, требаше да ја добијам многу порано, во 80-тите години на минатиот век кога можеби сум бил во центарот на моите преродбенички и духовни ангажмани.

Но сеедно, Божјата волја сакаше вистината да не ме промаши и кога-тогаш, да дојде таа награда и ја примам со задоволство поради тоа што го носи големото име, инаку..!“

Серафимовски ја изработувал скулптурата една година. За него св. Климент претставува посебна инспирација. „Тој е инспирација не само за ликовните уметници, туку и за музичарите, за писателите, поетите“, рече академикот. (К.Б.)