Економско - политичка криза во Европа
Финансиско-економската криза што кон крајот на минатата година го зафати светот, веќе го зема данокот во многу земји ширум Европа, како во стопанството, така и во политиката. Една третина работници во Европа се многу загрижени, бидејќи се плашат дека може да ја изгубат работата поради сегашната финансиско-економска криза, потврди истражувањето кое го спроведе заводот за статистика на Европската унија „Евростат“.
Најновата анкета покажа дека граѓаните се' уште не им веруваат на политичарите и на економистите, кои последниве денови тврдат дека најлошото поминало и оти се забележуваат првите знаци за заживување на стопанството. Шест од десет Европејци сметаат дека најлошото допрва треба да се случи и оти ова било само почеток, покажа најновата анкета. Песимизмот е најмногу присутен во балтичките земји, додека Швеѓаните и Данците се уверени дека кризата достигнала кулминација, па сега може да се очекува економско зајакнување.
Сегашниот песимизам во Европа, според процената на „Евростат“, пред се', се темели на исклучително големата невработеност, што последниве месеци ја зафати Европа. Стопанството се соочи со рецесија, фирмите банкротираат, економскиот раст стагнира или е во пад, не се отвораат нови работни места. Напротив, многу фирми се принудени да ги отпуштат работниците и службениците, бидејќи се нашле пред банкрот.
Според најновите податоци, рекордна стапка на невработеност е забележана во Шпанија - 18,7 отсто, Литванија - 16,3 проценти и Естонија - 15,6 отсто. Сега во најдобра ситуација се Холандија и Австрија со невработеност од 4,3 отсто, и Кипар со 5,3 отсто.
Кога кон крајот на минатата година и на почетокот на оваа финансиско-економската криза ги зафати светот и Европа, сите влади, без исклучок, беа принудени да усвојат мерки за штедење за да се справат со рецесијата и со длабокиот пад на стопанството. Цената мораа да ја платат тие што најмалку имаат - работниците и службениците. Тоа предизвика големо незадоволство и бран на штрајкови ширум Европа, Грција, Бугарија, Франција и балтичките земји. Презадолжениот Исланд беше прва развиена земја во светот, која банкротираше и сега бара итна постапка за да влезе во Европската унија. Економската криза веќе го зема политичкиот данок, а таа беше главен виновник за падот на владите во Софија и во Рејкјавик. (Според агенциите) |
