Учебниците со грешки засега ќе преживеат

Учебниците за основците што досега беа на проверка за евентуални грешки ќе се употребуваат до крајот на учебната година, најави вчера министерот за образование и наука, Никола Тодоров. Тој ретерираше од првичниот став дека од употреба ќе бидат повлечени најмалку два учебника откако почнаа да пристигаат извештаите од ревизорските тимови што ги скенираа грешките во учебниците. Ниту, пак, сакаше да открие повеќе детали на тема учебници. „Не ги кријам резултатите од суперревизијата, целта е да се ослободиме од влијанија и од притисоци. За да го избегнеме субјективизмот во оценувањето, ќе направиме интервју со авторите за чии учебници имаше мислење да се повлечат за што ќе формираме посебен тим од седум члена“, изјави Тодоров на вчерашната прес-конференција и додаде дека паралелно работат и на измени во законот.

Во врска со непотизмот на факултетите, министерот очекува најдоцна за еден месец да добијат слика за семејните вработувања на сите универзитети. Додека за статусот на Универзитетот Тодоров најави дека ќе разговара со ректорот на Скопскиот универзитет и со професорите. Министерот вчера ги промовира информациските системи за управување во образованието и за управување со човечки ресурси, ЕМИС и ХРМ. Преку нив ќе може да се има увид во комплетната состојба на училиштата, инвентарот, бројот на ученици... Сепак, овие податоци нема да може да ги гледа секој, туку ќе бидат селектирани за корисниците. Тодоров го најави овој проект како еден од најголемите проекти во ресорот образование. „Ќе нема злоупотреба со личните податоци“, уверуваше министерот Тодоров. (Ж.Ѓ.)