Се' послабо свети плаќањето на рати

Досега само 10.000 домаќинства склучиле договори за одложено плаќање, вкупниот број тужби е околу 500 илјади

Маја Томиќ

Илјада фирми и приближно 10.000 домаќинства. Толкав е билансот на склучените договори за плаќање на тужените сметки за струја на рати, без камата. А, се спомнува дека вкупната бројка на тужби по основа на неплатени сметки за електрична енергија изнесува дури околу 500 илјади. Дали спласна големиот интерес кај корисниците кои на самиот почеток на кампањата, на 1 октомври, побрзаа и буквално навалија на шалтерите на ЕВН за да склучат договори за плаќање на рати.

Последните бројки се однесуваат заклучно со 16 декември. Како што е познато, крајниот рок за оваа можност што им ја дадоа „ЕВН Македонија“ и ЕЛЕМ на корисниците истекува на 31 декември. Од ЕВН не сакаат сега да коментираат дали бројката задоволува или не, затоа што рокот се' уште не е завршен и може да се случи во последните денови од месецот повторно да има турканици на шалтерите.

„Можноста да го расчистат долгот им е дадена на сите корисници и тие треба да ја искористат. Затоа што од 1 јануари следната година веќе нема да ја имаат шансата за плаќање на долговите на рати, а за неплатените сметки, нормално, како крајна мерка, ќе следува исклучување“, велат од ЕВН и посочуваат дека за потрошувачите е подобро да ја искористат оваа поволност, посебно затоа што се ослободени од плаќањето на каматите, кои често се повисоки од основниот долг.

Инаку, од стартот на кампањата до средината на ноември беа потпишани 5.500 спогодби, а само во октомври се склучија околу 3.000 договори за плаќање на рати. И тогаш, како и овој месец, интересот за расчистување со долговите беше поголем кај домаќинствата.

ЕВН и ЕЛЕМ прв пат им дадоа шанса на домаќинствата да го плаќаат долгот од тужените сметки на 12 рати, ако сумата е над 51.000 денари. Додека бизнис-корисниците тужениот долг можат да го исплаќаат на најмногу шест рати, ако е тој над 50.000 денари. Притоа, акцијата подразбира дека се наплатува основниот долг, без камата.

Останува да се види дали оваа кампања, која е во тек, на крајот ќе даде подобри резултати од претходната што ја спроведе ЕВН за наплата на долговите на рати во почетокот на август, а која траеше до 1 ноември. Во почетокот имаше засилен интерес кај граѓаните поради што ЕВН и' го пролонгира крајниот рок за уште еден месец - наместо до октомври, до 1 ноември. Но, на неколку дена пред истекот на тој рок, беа склучени само 6.000 договори, што беше малку ако се има предвид големата бројка на реалните должници.