Концерт на Дуке Бојаџиев пред скопската публика

На 27 август во скопскиот клуб „Колосеум“, Бојаџиев ќе настапи со електроакустичен сет составен од пијано, фендер роудс и електронска опрема

По настапот на Античкиот театар во Охрид, Дуке Бојаџиев со поинаков концепт ќе настапи и пред скопската публика. Имено, на 27 август, во 23,30 часот, во скопскиот клуб „Колосеум“, Бојаџиев ќе настапи со електроакустичен сет составен од пијано, фендер роудс и ��лектронска опрема, заедно со своите долгогодишни соработници Матијас Кунцли на тапани и перкусии и Кристоф Хетиер ака Антипоп, еден од тројцата основачи на популарното француското трио „Телепоп-мјузик“.

Овој пијанист и продуцент повеќе од десет години живее и создава во Њујорк. По електронските настапи со Кирил Џајковски и ТК Вондер во 2008 година („Егзит“ во Војводина, ВИПин во Загреб, „Пиво фест“ во Белград и „Офест“ во Скопје) и соло-настапот во 2010 година во Капан-ан во Скопје, годинава го видовме во едно друго, акустично издание. Откако премиерно во преполниот Карнеги хол во Њујорк беше изведен проектот „Love is the way“, тој својот концерт за пијано и оркестар го донесе на „Охридско лето“.

Матијас Кунцли е перкусионист со светско реноме. Тој во изминатите десет години се појавува низ многубројните комерцијални проекти, албуми и филмски создавања на Бојаџиев, но во меѓувреме соработува и настапува и со ѕвездени имиња од калибарот на Моби, Лорен Хил, Јо-Јо-Ма и други светски докажани музичари. Скопскиот настап ќе биде извонредна прилика да ги видиме неговите тапанарски способности, но и неговиот виртуозен перкусионистички елемент.

Кристоф Хетиер ака Антипоп, со кого Дуке соработува изминатите пет години, е член на познатото француско трио „Телепоп-мјузик“, номинирано за наградата „Греми“ со хитот „Breathe“ во изведба на Анџела Мекласки, на што се надоврза и успешната соработка со Џенет Џексон. Како диџеј, Антипоп последните десет години го обиколува светот.

На скопскиот настап со Бојаџиев ќе чуеме дел од нивните соработки и ремикси, меѓу кои е и нумерата „Ghost girl“, од престижната компилација „Airfrance“, лиценцирана за годишната интернационална адвертајзинг-кампањата на „Пежо“ во 2009 година. Инаку, Дуке се појавува и како коавтор и копродуцент на новиот албум на „Телепоп-мјузик“ што ќе излезе кон крајот од годинава. (К.Р.)