Претходен број

Либерална врие по излегувањето од власта

Дваесет и три општински организации на Либералната партија се дистанциираат од коалицирањето на лидерот Стојан Андов со „Сонце - коалиција за Европа“, бидејќи сметаат дека станува збор за самоволие. Тие ги повикаа своите симпатизери да гласаат за коалицијата предводена од ВМРО-ДПМНЕ, бидејќи досега не била донесена одлука за коалицирање во највисокото тело на партијата - Републичкиот одбор. Од ваквите обвинувања вчера јавно се огради Либералната партија предводена од лидерот Стојан Андов, која ваквите активности ги нарече „незаконски и нелегитимини“.

„Поголемиот дел од членовите на Извршниот комитет и членови на Републичкиот одбор укажаа дека остануваат членови на ЛП, но во овој момент процена е на општинските организации дека треба да ја продлабочат соработката со стратегискиот партнер ВМРО-ДПМНЕ“, изјави Драган Василевски, член на Извршниот одбор и претседател на прилепската организација на вчерашната прес-конференција, на која присуствуваа и други членови од партијата.

Претставници на овие организации најавија дека ќе побараат свикување на Републичкиот одбор, кој е највисоко тело на партијата, затоа што досега не било сторено тоа од страна на лидерот. „Статутот е грубо прекршен, а 23 општински организации укажаа дека е прескокнат највисокиот орган - Републичкиот одбор, а затоа и нема одлука за коалицирање, туку за преговори“, рече Василевски.

Тој вели дека поднеле кривична пријава против генералниот секретар на партијата, Ивон Величковски, за злоупотреба на функцијата, бидејќи сметаат дека го злоупотребил печатот на партијата.

Најави за кривично гонење за сите оние што лажно се претставуваат во име на ЛП вчера пристигнаа и од седиштето на партијата.

„Сите иницијативи и обиди за организирање активности и состаноци во име на ЛП од страна на нејзини поранешни високи државни и локални функционери кои сега се активисти на ВМРО-ДПМНЕ се противстатутарни, незаконски и не ја претставуваат ЛП“, се вели во соопштението. Во него се додава дека ниту одлуките на овие членови немаат легитимност или правно дејство. (Ж.Х.З.)