Светот згрозен од најскапата елка

АБУ ДАБИ - Луксузниот хотел во Абу Даби, што се фалеше со божикна елка вредна 11 милиони долари декорирана со злато и скапоцени камења, призна дека можеби претерал со празничниот дух. Во соопштението од хотелот „Емиратс палас“ се наведува дека жали за „обидите да се претера“ со традицијата за китење на божикната елка со нејзино разубавување со првокласни украси вклучувајќи злато, рубини, дијаманти и други скапоцени камења од хотелскиот јувелир. Соопштението е редок пример на рефлексија на обичајот да се претерува во Заливот.

Божикната елка беше откриена минатата недела со фанфари во хотелот, кој има сопствен автомат за продавање златни прачки и нуди еднонеделен пакет во вредност од еден милион долари, што вклучува излети со приватен авион низ Блискиот Исток. Меѓутоа, менаџментот на хотелот, очигледно, почна да пројавува сомнежи откако се поведоа прашања околу тоа дали луксузната елка е само добра празнична намера или несреќен лош вкус.

Хотелот жали за „обидите да се претера со традицијата што ја почитуваат повеќето хотели во земјата, со значења и конотации што не се во согласност со професионалните стандарди на хотелот“, се наведува во соопштението објавено од државната новинска агенција ВАМ.

Иако официјално е муслиманска земја, Обединетите Арапски Емирати покажуваат голема почит кон Божик поради големата странска популација во земјата. Светилки, божикни песни и украси се забележуваат во речиси секој трговски центар.