Коњановски: Многу сме блиску до ЕУ и до НАТО

„Алтернатива за регионална соработка нема. Покрај тоа што сите земји од Југоисточна Европа кои се движат кон НАТО-алијансата треба индивидуално да се вложат во исполнување на реформите, сепак, сите треба да внимаваат на регионалниот пристап и целокупниот ангажман да го насочат кон доближување на регионот кон евроатлантските интеграции“. Ова вчера го изјави министерот за одбрана, Зоран Коњановски, на отворањето на 13. конференција на началниците на армиите од земјите-членки на Јадранската повелба. Тој истакна дека балканските држави се мали, но можат многу да придонесат во борбата против глобалниот тероризам и заканите што се јавуваат со лиферација со оружје. Коњановски не заборави да ја истакне соработката и залагањето на САД за приближување на земјава кон евроатлантските структури.

„Резултатите од соработката со САД очигледно се видливи. Јасно е каде беше нашиот регион во 2001-2002 година, а денеска е многу блиску до целосна интеграција во ЕУ и во НАТО“, истакна Коњановски.

Амбасадорот на САД во земјава, Филип Рикер, рече дека американско-македонското партнерство и натаму ќе продолжи и додаде дека за него големо значење има проширувањето на Јадранската група.

„Меѓу САД и Јадранската група и директно со Република Македонија има успешна соработка. Ние сме присутни на средбата преку Европската команда на САД со генерал Џон Гарднер, како и преку НАТО со адмирал Семјуел Локлир. Имаме многу добра соработка и освен ваквите состаноци успешно соработуваме на терен во Авганистан и во Ирак, со што се потврдува партнерството што постои меѓу САД и Македонија“, изјави амбасадорот Рикер. (П.Р.)