Винарите се' поисплашени од грчкиот притисок

Во проблемот се крие политика, а преку него сакаат да извршат притисок врз Македонија за промена на името, велат винарите

Ангел Данов

Притисокот од Грција за извоз на македонското вино се' повеќе ги плаши домашните винарници. Тие прашуваат на кој начин државата, во услови на силни притисоци, ќе го заштити македонскиот бренд. Оптимистичките најави на Министерството за земјоделство дека нема да има проблеми при извозот на македонско вино наредната година, многу не ги увери винарите и нема позитивни реакции, напротив стравот дека ќе се преполови пласманот на нашето вино во земјите од Европската унија е се' поприсутен.

Според винарите, грчкиот притисок спрема земјите на ЕУ за пласман на македонското вино ќе предизвика сериозен финансиски удар на и така тешката состојба во која се наоѓа винската индустрија. Дел од нив сметаат дека во целиот проблем, всушност, се крие политика. „Преку овој сегмент, со грчкото влијание врз европските партнери, се сака да се изврши политички притисок врз Македонија за промена на името. Бидејќи секоја промена на етикетите на декларациите со кои се извозува македонскиот производ под некое друго име, тоа де факто би значело и промена на името на државата“ вели Ѓорѓи Богевски од винарската визба „Бовин“ во Неготино.

И во штипската винарница „Аневски“ сметаат дека грчкиот притисок ќе има негативно влијание врз продажбата на македонското вино, особено во Германија, каде што сега извезуваат над 30 милиони литри вино. „Нашите бизнис-партнери во Германија лобираат кај својата влада многу да не ги слуша Грците, бидејќи македонското вино е познато во оваа земја и тие имаат интерес да го продаваат нашето вино“, вели Ѓорѓи Бебеџаков од винарската визба „Аневски“. Тие се жалат дека откако Грција реагираше на географското потекло и терминот „македонско вино’, органите на Унијата побарале од Словенија да повлече четири вида македонско вино од рафтовите во продавниците, а германските трговски комори ги информирале визбите дека од 1 јануари идната година нема да смеат да пласираат македонско вино. Винарниците сметаат дека Владата треба поактивно да се вклучи во борбата околу признавањето на македонското вино, но и државата да го заштити виното како македонски бренд за полесно да функционираат визбите на странскиот пазар.

Според домашните винарници, дополнителни компликации во винската индустрија предизвикуваат и сериозните проблеми во лозарството. Веќе ��еколку години визбите, поради големите резерви вино, доцнат со исплатата на парите за откупеното грозје.

Димовски оптимист за извозот на вино

Министерот за земјоделство, шумарство и водостопанство, Љупчо Димовски, смета дека со Брисел, а не со Грција, треба да се реши проблемот со забраната за извоз на македонското вино во шишиња со етикета со географско потекло. Тоа требало да се направи со потсетување на Спогодбата за асоцијација и стабилизација, на Винскиот протокол и на природните права што Македонија ги има во користењето на името „Македонија“. Димовски е уверен дека проблемот ќе се надмине и во следниот период не би требало да има никакви пречки околу извозот на македонското вино на начин како што беше и досега. „Македонија има принципиелен став во врска со решението околу проблемот со виното, а тоа е користењето хомоним. Тоа значи дека сите земји што се наоѓаат на просторот на Македонија би можело да го користат хомонимот ’Македонија‘. Сметам дека после Нова година нема да има особена пречка околу извозот на македонското вино, пред се', на пазарите на Европската унија“, изјави вчера Димовски. Според него, проблемот со извозот на македонското флаширано вино на странските пазари со етикета со географско потекло е настанат поради регистрирањето на регионот „Македонија“ во регистарот на вински региони на ЕУ од страна на Грција.

„Во 1989 година грчкото Министерство го има регистрирано регионот ’Македонија‘ во регистарот на вински региони на ЕУ. Во 2000 година тоа е повторено и неколку месеци потоа излезен е регистарот на веб-страницата на винските регистри ’ебахус‘. Се прашувам зошто воопшто не е реагирано. Ние сме први што правиме напори да се разреши проблемот“, појасни Димовски. Тој посочи дека од 1 јануари до 15 ноември годинава Македонија има извезено 67 милиони литри вино, што е за 23 милиони повеќе во споредба со минатата година. (Ек.Р.)