Албанците се спасија од поскапување на струјата

Албанскиот регулатор за енергетика, ЕРЕ, донесе одлука со која цената на струјата за сите потрошувачи останува непроменета. „Цените на енергијата за 2011 година ќе бидат идентични со овие од 2010. Исто така, нема укинување на двојните тарифи, што значи дека за оние што месечно трошат до 300 киловат-часови цената останува 7,7 лека, додека за над 300 квч е 13,5 лека“, изјави првиот човек на ЕРЕ, Бујар Неправишта. Потрошувачите на електрична енергија во Албанија се спасија од зголемување на цената, бидејќи ЕРЕ одлучи да ја намали цената со која албанската електрокорпорација КЕШ и' ја продава на „Чез Албанија“, поранешна Електродистрибуција. Според ЕРЕ, јавната компанија КЕШ, која моментно на „Чез“ му ја продава струјата по цена од 2,03 лека за квч, наредната година ќе ја продава по 1,48 лека. Министерот за економија и енергетика и вицепремиер, Илир Мета, оцени дека одлуката на ЕРЕ е во правец на заштита на потрошувачите. „Чез Албанија“, КЕШ и секторот за пренос бараа поскапување на струјата од 1 јануари наредната година за 12 отсто. Од почетокот на годинава албанските потрошувачи плаќаат струја поскапа за 13 отсто споредено со лани. (МИА)