ВМРО-ДПМНЕ најави кадровска чистка

Околу 150 функционери ќе бидат опфатени со акцијата на владејачката партија - „нов бран промени“

Околу 150 функционери од редовите на ВМРО-ДПМНЕ ќе бидат сменети и на нивно место ќе се постават нови, во рамки на акцијата „нов бран промени“, што ќе ја реализира владејачката партија во шестата година од преземањето на Владата. Паралелно, ќе продолжат и кадровските промени на локално ниво, во општинските комитети на партијата, а ќе се „освежува“ и „Манифестот“ на ВМРО-ДПМНЕ, особено во делот што се однесува на економскиот развој на државата и социјалните прашања.

Според Илија Димовски, директор на Центарот за комуникации на ВМРО-ДПМНЕ, најавените промени се во духот на „постојаниот и континуиран процес на реформи“, што го преземала ВМРО-ДПМНЕ, промовирајќи нов стандард во функционирање на партиите.

„Тоа е и она што не' разликува од другите партии“, изјави вчера Димовски за МИА. Тој вели дека ВМРО-ДПМНЕ е партија која внесува новитети во функционирањето и дека ваква иницијатива не произлегла од ниту една партија што досега била на власт. Иницијативата за кадровско освежување произлегла од Извршниот комитет и од претседателот на ВМРО-ДПМНЕ, премиерот Никола Груевски. Пет месеци се анализирала работата на сите директори, началници на јавни претпријатија, фондови, управи - на државно ниво и во сите општини во Македонија. Според Димовски, биле земени предвид сите параметри, како постигнатите резултати, отвореноста и одговорноста спрема граѓаните, динамиката на работа...

„Во тек е процедура за избор на претседатели на општински комитети на партијата во две третини од градовите низ Македонија“, изјави Димовски за МИА, најавувајќи дека ВМРО-ДПМНЕ наскоро ќе промовира низа нови проекти и мерки што ќе значат и програмско освежување на партијата. (П.Р.)