Тајландските војници се судрија со црвенокошулашите

Поради можната поделба меѓу полициските сили ќе биде потешко да се спречи насилството

БАНГКОК - Тајландските војници вчера се судрија со антивладини демонстранти во центарот на Бангкок, во обид да го изолираат нивниот привремен камп откако обидот за атентат на генерал-предавник предизвика нов бран насилство. Војниците отворија оган на крстосницата што води до кампот, во еден елегантен хотел и шопинг-кварт, каде што демонстрантите се наоѓаат пет недели, јави очевидец на Ројтерс, додавајќи дека забележал неколку повредени лица, меѓу кои двајца новинари. Не е познато дали војниците користеле вистински куршуми, гумени куршуми или и двете, додаде тој.

Странски новинар со седиште во Бангкок, кој работи за телевизијата Франс 24 е повреден, јави телевизијата, а еден тајландски фотограф, исто така, беше погоден, јави очевидец за Ројтерс.

Аналитичарите јавуваат дека поради можната поделба меѓу полициските сили, лојални на соборениот премиер Таксин Шинаватра, и војската, ќе биде потешко да се спречи насилството. Стравувањата беа нагласени откако еден тајландски полицаец пукаше кон војниците за време на судирите, јави очевидец за Ројтерс.

Војниците треба целосно да ги затворат сите главни патишта што водат до кампот на „црвените кошули“, наметнувајќи прашања дали владата наскоро би можела да ги оконча протестите. Најмалку едно лице загина, а 11 беа повредени во насилството од четвртокот ноќта, но се очекува билансот да се зголеми. Многу болници одбија да дадат точен број на жртвите.

Демонстрантите формираа сопствен контролен пункт во текот на ноќта на познатиот ноќен пазар Суан Лум за да ги спречат војниците да ги затворат патиштата околу нивниот главен утврден камп во комерцијалниот центар на Бангкок. Тоа место стана едно од главните бојни полиња. Тие запалија автобус, моторцикл и гуми додека се повлекуваа, а војниците презедоа контрола врз крстосницата што води кон патот со хотели, резиденцијата на американскиот амбасадор и неколку амбасади, кои се затворени и евакуирани.

Најновото насилство следуваше по строгите безбедносни мерки воведени во четвртокот навечер за да се заземе комерцијалниот кварт на Бангкок по пропаѓањето на планот за помирување, предложен минатата недела од премиерот Абхисит Веџаџива. Не е познато кој пукаше во генералот предавник, одговорен за безбедноста на илјадници демонстранти, кои зазедоа територија од 3 квадратни километри во центарот на Бангкок од 3 април. Катија Савасдипол, суспендиран воен специјалист познат како „Сех Даенг - црвениот команда��т“, беше погоден во главата, очигледно, од снајперист додека разговараше со новинарите во четвртокот навечер. На генералот му беше извршен хируршки зафат на мозокот и тој се наоѓа во критична состојба. (Ројтерс)