Ал Каеда го киднапирала Французинот во Нигер

ЛОНДОН - Северноафриканското крило на Ал Каеда вчера презеде одговорност за киднапирањето на Французинот Мишел Германо, кој беше киднапиран во април, во северниот дел на Нигер, јави разузнавачката група СИТЕ со седиште во САД.

Групата СИТЕ, која ги следи исламистичките веб-страници, јави дека Ал Каеда во Исламски магреб (АКИМ) објавила аудиопорака од 78-годишниот Германо, негова фотографија и копија од личната карта. Милитантите бараа размена на затвореникот и истакнаа дека францускиот претседател Никола Саркози ќе биде одговорен за животот на затвореникот, јави СИТЕ во својот извештај.

Воени извори во Нигер јавија дека возачот од Алжир, кој бил заробен со Германо, бил ослободен и пронајден како скита низ пустината во Мали кон крајот на април. Владите имаат мало влијание во пустинскиот регион каде што оперираат бандити, шверцери, поранешни бунтовници и групи поврзани со Ал Каеда.

Мали, Нигер, Алжир и Мавританија формираа заеднички воен штаб во јужен Алжир, кој тројно ќе го зголеми бројот на војниците со кои располага, односно ќе достигне 75.000 за две години. (Ројтерс)