ДУИ ќе чепка и во Уставот, ама не ја напушта коалицијата

Ставот на интегративците дека ќе бараат нов Устав ако се изгласа законот за бранители за професорот Љубомир Фрчкоски е повик за помирување со ВМРО-ДПМНЕ

Наум Котевски


„Ако помине законот за бранители, Албанците ќе бараат нов Устав“, најави вицепремиерот Муса Џафери во пресрет на Денот на независноста на мултиетничка Македонија во емисијата „Патот кон“ на Алсат. Додека неговите сопартијци од ДУИ ја тераат сизифовската битка во Собранието, држејќи долги говори со кои практично ја блокираат работата на Комисијата за труд и социјала, која прва го разгледува, засега, заглавениот контроверзен закон, Џафери тврди дека неговото евентуално донесување, практично, ќе значи етничко надгласување или мајоризација.

„На крајот ќе има целосна етничка поделба. Ако сега се донесе закон што не е во согласност со Рамковниот договор, тогаш ќе се остави простор за отворање нови теми за кои ќе биде уште потешко да се решат. Верувам дека искуството на политичките партии, не само на ВМРО-ДПМНЕ, туку и на другите, ќе придонесе да се спречи овој процес“, порача Џафери.

Ваквото размислување, како официјален партиски став на ДУИ, вчера ни го потврди портпаролот на партијата Бујар Османи.

„Ако се изгласа законот, Албанците немаат друго чаре освен да бараат нова уставна рамка. Со етничкото надгласувањето се крши Рамковниот договор, кој е дел од Уставот. Тоа значи дека се дејствува спротивно и на Уставот“, потенцира Османи.

Еден од експертите кои учествуваа во подготвувањето на Уставот, профе��орот Љубомир Фрчковски, смета дека тоа се само игри на ДУИ. „Уставот е менлива работа. Секоја политичка партија може да побара измени. Но, јасно е дека ДУИ сега чепка по Уставот, како барање за помирување со ВМРО-ДПМНЕ. Ќе се изнаслушаме сега секакви работи. Ако навистина ДУИ сака да излезе од коалицијата, тоа веќе ќе го направеше“, смета Фрчкоски.

Тој, меѓу другото, потсетува дека за евентуални промени во Уставот е потребно двотретинско мнозинство во парламентот. „Албанските партии го немаат тоа. Тоа значи дека погледот демек го вртат и кон опозицијата во македонскиот блок. Оттука може да заклучите колку е тоа несериозно и колку се евтини овие трикови“, додава Фрчкоски.

И координаторот на пратеничката група на ДУИ, Талал Џафери, кој во средата и четвртокот со часови читаше делови од Уставот, рече дека некој се обидува незаконски, со просто мнозинство, да го протурка законот.

„Законот вели дека кога се одлучува за правата на етничките заедници, потребно е двотретинско мнозинство од вкупниот број пратеници, но и мнозинство од пратениците од етничките заедници кои не се мнозинство во државата. Акт за надгласување на Албанците нема да има. Или ќе има кога ќе нема ниту еден Албанец во оваа Комисија“, потенцираше Џафери.

Во овој контекст и потпретседателката на Собранието, Сузана Салиу, жестоко ја нападна пратеничката на СДСМ, Радмила Шеќеринска, која смета дека законот не е противуставен и дека не е спротивен на Рамковниот договор.

„Како може да велите дека законот не е спротивен на Охридскиот договор. Таму јасно се одредуваат две страни во конфликтот - македонска и албанска. Чувствата ви се еднострани. Зар не загинаа и Албанци, дури и петгодишни деца. Зар некој не жали за нив“, потенцира Салиу.

Во анализата на познатата организација за меѓународни стратегиски политички истражувања Стратфор од САД, за која се смета дека е добро поврзана со високите политички кругови во Вашингтон, заканата на ДУИ за излегување од Владата покажува дека членовите на двете партии од владејачка коалиција се вртат кон национализам за да ја одржат поддршката на јавноста, како што забавува македонската економија, се вели во анализата.

„Стратфор“ смета дека климата ќе се заострува со наближување на мартовските локални избори, но тоа не се очекува да резултира со зголемување на етничкото насилство. Сепак, се проценува дека политичкиот ќор-сокак во кој се наоѓа Македонија ќе го попречи напредокот во клучните надворешнополитички цели.

Во написот се вели дека Никола Груевски се' уште е најпопуларен политичар, но дека неговата партија ја губи поддршката кај електоратот и затоа е донесена стратегијата за приближување кон националистичките елементи, иако тоа значи создавање тензии со албанскиот коалициски партнер. Паралелно со политичките недоразбирања, најголем проблем на Владата е економијата, која дополнително ќе се влошува во наредниот период. Затоа, ако нема договор со ДУИ за спорните прашања, Груевски, за да спречи поголем пад на довербата кај гласачите, би можел да оди на варијантата предвремени избори.