Субвенциите ги поделија струмичките земјоделци

Задоволство и револт меѓу земјоделците од Струмичкиот регион донесе владината одлука за субвенции од два денара за секој предаден килограм домати и краставици на откупните пунктови. Првата забелешка се однесува на тоа што земјоделците не биле навреме информирани и поради тоа сите не ќе можат да го искористат субвенционирањето. Голем дел од нив производството веќе го предале на диви откупувачи и не поседуваат кантарна белешка, што е основен услов за искористување на субвенциите.

„Одлуката на Владата е добра, но субвенцијата од два денара ќе можат да ја искористат само дел од земјоделците. Таа ќе важи за оние што ги предадоа доматите и краставиците на откупните пунктови и имаат кантарна белешка. Но, има земјоделци што ги дадоа на кванташки пазар и на диви откупувачи. Најжално е тоа што во тој период немаше интерес за краставиците и дел од земјоделците ги фрлија на депониите. Според процените, околу педесет отсто од производителите на овие култури не поседуваат кантарни белешки“, изјави Васил Митушев од здружението „Кукла градинар“ од Куклиш.

Според земјоделците, со предложените два денара многу малку ќе се надоместат производствените трошоци.

„Производната цена на овие култури е околу дваесет денари за килограм, а откупната цена падна и на три денари. Со субвенцијата од два денара ќе стасаме до пет денари, со што не можеме да ги покриеме трошоците за производство. За нас не останува речиси ништо“, вели Ристо Велков од здружението „Агро сојуз“ од Василево. (Е.П.)