Нејмар од јануари во Реал Мадрид

Шпанската „Марка“ објави вест дека Реал Мадрид се договорил со Сантош околу трансферот на големата ѕвезда Нејмар - и тоа од јануари.

Нејмар треба да настапи на светското клупско првенство што ќе се одржи од 8 до 18 декември во Јапонија, а потоа правец Мадрид.

Реал така ја испочитува големата желба на челниците на Сантош да го имаат Нејмар во составот за мечот против Барселона.

И Каталонците беа во игра за Нејмар, но, по се' изгл��да, испаднале од трката.

Лукаку во Челзи, Кару во Вест Хем

Андерлехт потврди дека 18 годишниот напаѓач Ромел Лукаку кариерата ќе ја продлжи во Челзи.

„Жал ни е што Ромел заминува. Андерлехт го откри уште кога беше само талентирано дете. Наскоро ќе најдеме замена за него“, сооппштија од клубот.

Тренерот на Челзи, Андре Виљаш Боаш, рече дека се радува поради доаѓањето на Лукаку.

„Тој е интересен играч и сега е во ситуација максимално да го искористи својот талент“, изјави Португалецот. Се шпекулира дека Андерлехт од Лукаку ќе заработи 15 милиони евра.

Вест Хем остана без неколку фудбалери откако ја напушти Премиерлигата. Но, има и такви кои немаат ништо против да играат за второлигаш. Меѓу нив е искусниот Норвежанец Џон Кару, кој стигна како слободен играч и ќе му прави друштво во нападот на Карлтон Кол.

Фуриозен старт на „милионерите“

Германскиот шампион Борусија Дортмунд со победата од 3:1 над Хамбургер ја отвори новата серзона во Бундеслигата. Убедлив во првото коло беше и Штутгарт кој го совлада Шалке со 3:0.

Резултати: Келн - Волфсбург 0:3, Аугсбург - Фрајбург 2:2, Хановер - Хофенхајм 2:1, Штутгарт - Шалке 3:0, Вердер - Кајзерслаутерн 2:0, Херта - Нирнберг 0:1. Вчера играа Мајнц - Баер Л, Баерн Минхен - Менхенгладбах.

Нов тинеЈЏер на „Емирати“

Талентираниот крилен напаѓач на Саутемптон Алекс Окслејд Чембрлејн, кој ќе стане полнолетен за една недела, е се поблиску до Арсенал.

Целиот трансфер би требало да изнесува 12 милиони фунти, со тоа што на Саутемптон веднаш ќе му припаднат седум милиони, додека преостанатиот дел ќе зависи од идните настапи.

Клосе и Сисе го бркаат Зарате од Рим?

Иако беше еден од најдобрите играчи на Лацио минатата сезона, не е исклучено Мауро Зарате да го напупшти Рим до крајот на месецот. По доаѓањето на Клосе од Баерн и Сисе од Панатинаикос, дојде до турканица во шпицот.

„Тој и понатаму е важен играч за нас. Одлично работеше и даваше блескави партии“, изјави спортскиот директор на клубот Игли Таре и заклучи дека се' уште не се знае судбината на Зарате.