|
|
|
|
|
|
|
Металург и Напредок засега непоразени
Стоотстотен ефект на Металург на домашен терен во воведните два меча во новата сезона во македонското фудбалско првенство. По триумфот над Тетекс со 2:0 на стартот, составот на Жикица Тасевски впиша уште три бода на клупското конто, по вторпат без примен гол. Металурзи во саботата го совладаа Хоризонт Турново со 1:0. Стрелец на единствениот погодок беше стоперот Горан Драговиќ во 78 минута.
Реализацијата останува проблем на Железарница. Напаѓачите во зелено (стартерите Ејупи и Илијоски и резервистот Начевски) и овојпат имаа проблеми да ја погодат целта. Во некои ситуации беа брзоплети, во некои бавни, во некои, пак, правеа потег повеќе. Создадоа неколкуте шанси и полушанси во кои не успеаја да поентираат Захариевски и Ејупи во првиот дел и Миле Крстев во два наврата и по еднаш Илијоски, Тенекиџиев во вториот дел. Како се прави тоа им покажа дефанзивецот Драговиќ по центаршут на Стевановиќ на 12 минути до крајот на средбата.
И Напредок, засега, е тимот со максимален ефект по два одиграни меча. Кичевци викендот како гости славеа кај Брегалница 2008 со 1:0. Моментот на одлука се случи рано, веќе во седмата минута, во која во главна улога беше Глишиќ. Резулатот, по неговата реализација, остана непроменет до последниот судиски свиреж во Штип иако и едните и другите имаа прилики да го изменат. Можност да се придружат на досега непобедливите Металург и Напредок утре ќе имаат скопските ривали Вардар и Работнички во дерби дуелот на второто коло закажан за 20 часот на националната арена „Филип Втори“.
Прва сезонска радост за фудбалерите на Силекс кои во Кратово ја совладаа Ренова со 2:1. Заревски во 39 минута и Нацев во 63 погодија за домашните, Гаши во 48 минута за гостите од Тетово.
Металург - Хоризонт Турново 1:0
Полувреме: 0:0. Стадион во Железарница. Гледачи: 150. Главен судија: Зоран Темелков. Помошници: Марјан Петров, Горан Димитров (сите тројца од Кавадарци). Жолти картони: Драговиќ (Металург), Василев (Хоризонт Турново). Стрелец: Драговиќ во 78 минута.
Металург: Павловиќ, Петковски, Драговиќ, Кралевски, Ѓорѓиевски, Захариевски (Тенекиџиев 58 мин.), Стевановиќ, Љамчевски (Костенцовски 58 мин.), М. Крстев, Илијоски, Ејупи (Начевски 72 мин.). Тренер: Жикица Тасевски.
Хоризонт Турново: Димовски, Митрев (П. Стојанов 49 мин.), Петров, Ташев, Милушев, Василев, Мавров, Ковачев (Ковачев 74 мин.), Сулев, Ѓоргиев, Лазаровски (Најденов 57 мин.). Тренер: Драган Христовски. (С.Д.)
Прва лига, 2. коло
Резултати: Металург - Хоризонт Турново 1:0 (Драговиќ 78 мин.), Брегалница 2008 - Напредок 0:1 (Глишиќ 7 мин.), Силекс - Ренова 2:1 (Заревски 39 мин., Нацев 63 мин. - Гаши 48 мин.).
Вчера играа: Шкендија - 11 Октомври.
Утре играат: Тетекс - Охрид 2004 (17 ч.), Вардар - Работнички (20 ч.).
|
#
|
|
|
Статијата е прочитана 321 пати.
|
|
|
|
|
|
|
|
