Последен збор

Блажо Ристоманов 1921-2010, градител

Вчера во Скопје е погребан Блажо Ристоманов, првиот генерален директор на градежната компанија „Бетон“. На 90-годишна возраст почина оден од големите македонски градители. Со неговото име се поврзани капиталните објекти на Македонија како што се скопската Железарница, Рафинеријата, Градскиот трговски центар во Скопје, Градскиот стадион и многу други. Роден е во 1921 година во Струмица, а образованието го дооформил во Штип и во Скопје. Иако беше во пензија повеќе од 28 години, тој целиот свој живот ја чувствуваше поврзаноста со фирмата на чие чело беше цели 30 години и со ист интензитет и жар говореше за годините минати на градилиштата низ државата, кога се создаваше македонското градителско јадро.

Работниот век на Ристоманов почнал во 1947 година кога прв пат бил ангажиран во тогашните младински работни бригади, каде што бил главен интендант, а од 1 јануари 1948 година станал началник на градилиште за исушување на струмичкото блато. Потоа бил повикан од Министерството за градежништво и именуван за главен диспечер во Министерството. На 1 јануари 1952 година бил назначен за генерален директор на „Бетон“. На чело на фирмата бил до крајот на својот работен век, до 1982 година.

Почетокот на неговото раководење со едно од најголемите градежни претпријатија во Македонија е поврзан со изградбата на помали објекти, како што се малите хидроцентрали „Зрновци“, „Сапунчица“, „Пештани“. Подоцна, под негово раководство се изградени и големите капацитети „Осломеј“ и РЕК „Битола“, фабриката „Тодор Циповски“ , па Јегуновце, Цементарница, ОХИС, Млекарница, Железарница, Рафинерија, Градски трговски центар во Скопје, Градски стадион – Јужна трибина, илјадници километри патишта и стотици квадрати станбен и деловен простор. Паралелно со професијата, не ја оставаше ниту својата втора љубов, па со еднаков жар ја извршуваше и задачата на претседател на ФК „Вардар“.

За неговото дело најдобро говорат бројните награди и признанија. Името на Блажо Ристоманов и по три децении од неговото активно работење остана симбол на професионалност, истрајност, објективност и пример на многу млади инженери за успех во работата. (Б.А.)