ДУИ се нервира кога опозицијата се радикализира

Демонстрациите на цивилниот сектор ја отсликаа и битката за превласт во албанскиот политички камп

Александра М. Митевска

Не им беше лесно на функционерите од ДУИ да стојат настрана, додека неколку илјади Албанци, поддржани од опозициските партии од албанскиот блок протестираа поради дискриминација низ скопските улици. Владејачката партија можеби се препозна како цел на протестите што ги организираше Советот на албанските организации, па затоа се обиде да го сврти вниманието кон себе. Нејзините пратеници ја напуштија тековната собраниска седница, практично, протестирајќи поради нивните партнери од ВМРО-ДПМНЕ, со кои не успеаја да најдат заеднички јазик за Законот за денационализација. Така, собраниската сала остана без ниту еден пратеник од албанскиот блок, бидејќи ДПА повеќе месеци го бојкотира законодавниот дом, а пратениците на НД се приклучија кон протестниот марш на невладините организации.

Ваљон Беља, од Советот на албанските организации, вели дека е задоволен од исходот на протестите, ако се има предвид дека ДУИ 24 часа дневно работела на нивно опструирање, меѓу другото, и заканувајќи им се со откази на Албанците во администрацијата, во случај да им се приклучат на демонстрантите. Според Беља, раководството на ДУИ очекувало масовен протест и поради тоа извадило толкаво полициско обезбедување на улиците.

„Каков апсурд - во исто време кога од ДУИ ни се смееја за протестите, самите тие протестираа, напуштајќи го Собранието. Тоа ја покажува нивната комунистичка матрица, бидејќи тие повеќе се интересираат за формата на протестите - колку се тие масовни отколку за нивната суштина - за што се протестира“, коментира Беља, откако Шефик Дураку, еден од владините портпароли ги оквалификува протестите како „малубројни“.

За присуството на НД на протестите, Беља вели дека раководството на оваа партија сакало политички да поентира и да ги наполни батериите. „Добивме поддршка и од другите опозициски партии, вклучително со ДПА, но тие не ги пратија своите функционери на протестите, туку дојдоа само претставници од членството. НД, пак, можеби нема членство, па мораше да дојде раководството“, нагласува Беља. Тој вели дека ако и по протестот продолжи дискриминацијата на Албанците во Македонија, тогаш ќе се преземат други мерки, кои ќе бидат поболни, ама легални, како, на пример, граѓанска непослушност.

Демонстрациите на цивилниот сектор на Албанците во Македонија, индиректно ја отсликаа и ситуацијата во албанскиот политички камп. Протестите под мотото „За правда“ укажаа дека се разгорува битката, во ситуација кога ДУИ е соочена со опасност од пад на популарноста, главно, поради молчаливоста за етноцентричните владини политики, а ДПА и НД се тркаат за водечка позиција во опозицискиот простор, првите преку засилен ангажман во базата, а вторите преку интензивни настапи на јавна сцена.

Впрочем, истиот ден кога албанските НВО протестираа во центарот на Скопје, а собраниската сала остана без претставници од албанскиот блок, ДУИ беше принудена на уште една (млака) реакција контра ВМРО-ДПМНЕ. Откако министерот за надворешни работи, Антонио Милошоски, навести дека датумот за преговори на Македонија со ЕУ може да ја чека 2011 година, интегративците апелираа до владиниот врв да се однесува државнички и да стави крај на еден тежок, но, сепак, надминлив спор (спорот со името).

Аналитичарот Сефер Тахири вели дека е евидентно оти подолго време се води реална битка за освојување на политичкиот простор во албанскиот блок - од една страна, меѓу ДПА и НД, како опозициски субјекти, а од друга страна, меѓу овие две партии и владејачката ДУИ.

„Начинот на кој настапуваат опозициските партии - со покритични тонови за одредени прашања, како името или некои моноетнички проекти, на пример, ’Скопје 2014 покажува дека тие сакаат да го освојат гласачкото тело што не го освоила ДУИ, односно незадоволниците од владините политики и неопределените гласачи“, оценува Тахири. Според него, евидентно е дека ДУИ ја губи поддршката на терен, но и дека нема значително покачување на рејтингот на НД, како нов политички субјект што се обиде да промовира нова филозофија и нови идеи за иднината на државата. Од тој аспект, како што наведува Тахири, растечкото незадоволство од политиките на ДУИ засега и' оди во прилог на ДПА.