Иванов - 365 дена сам на тронот

„Единството и виталноста на македонското општество не се потпираат врз владеење на посилниот или побројниот, туку на учеството на сите заедници и на сите граѓани во функционирањето на државата. Затоа ќе се залагам за доверба и пријателство меѓу сите граѓани“. Пред точно една година, ваква порака испрати Ѓорѓе Иванов, од неговата инаугурација како четврти претседател на државата - позиција на која дојде директно од Правниот факултет, со поддршка од владејачката ВМРО-ДПМНЕ и со салдо од околу 450 илјади гласови во вториот изборен круг.

Иванов, како прв „станар“ во новата претседателска резиденција на Водно, ги заокружи првите 365 дена од неговиот петгодишен мандат. Од оваа временска дистанца, поделени се размислувањата за тоа дали претседателскиот костум му помогна на професорот Иванов и реално да се наметне како фактор на единството и на виталноста на македонското општество. Во изминатиот период доминираа ставовите дека новиот претседател е млака политичка фигура што не може да се одлепи од сенката на премиерот и од влијанието на партијата што го донесе до тронот. Дека поради тоа има споредна улога и во надворешната и во безбедносната политика - области на кои се фокусирани надлежностите на шефот на државата. Гафовите со кои одвреме-навреме ја брануваше јавноста и минималниот рејтинг уште повеќе ја засилија перцепцијата дека политикологот не се снајде најдобро во високата политика.

Од друга страна, повеќето од јавните личности што пролетта 2009 година ја поддржаа кандидатурата на Иванов, се' уште веруваат дека на кормилото на државата застанал вистинскиот човек. Пејачи, актери, универзитетски професори, академици беа дел од делегацијата поддржувачи што вчера се сретнаа со Иванов.

„Со задоволство можам да кажам дека претседателот ги задржал своите човечки принципиелни вредности и ставови. Иако, на прв поглед, можеби не изгледа атрактивно и ефектно во својот мандат, мислам дека е многу вреден и дека тој начин на работа, кога и да е, ќе донесе важни резултати“, забележа публицистот Братислав Димитров.

Оперската певица Славица Галиќ-Петровска рече дека е задоволна како Иванов ја води државата и дека повторно би го поддржала, особено сега кога подолго време го познава. За ректорот на Универзитетот во Битола, Златко Жоглев, најважно достигнување на претседателот Иванов досега е креирањето и ширењето позитивна слика за Македонија. (А.М.М.)