Светот се дружи со Македонија преку Си-Ен-Ен

Миркица Поповиќ

Светот неделава интензивно се дружи со Македонија. Во понеделникот вечерта преку првото известувањето на Ана Корен и на Ник Робертсон, гледачите на „Ворлд оне“ и „и-лист“ на Си-Ен-Ен, имаа можност да го погледнат Скопје навечер, уште еднаш да слушнат за најпознатиот проблем на државата, конфликтот со Грција за името преку интервјуто со премиерот Никола Груевски, да се запознаат со фактот дека Вардар ги дели двете најголеми етнички заедници во државата, кои ги спојува Камениот мост, но и да уживаат во успешната приказна за создавањето на винарската визба „Попова кула“ преку разговорот со сопственикот Јован Трајков. Триесетминутните јавувањата директно од Скопје продолжуваат секоја вечер до петок во 21,30 часот на Си-Ен-Ен.

Сепак, првата репортажа фрли позитивно светло на државата, особено на нејзината внатрешна стабилност преку видувањата на граѓаните, кои, како што беше пренесено, не сакаат да се навраќаат на конфликтот во 2001 година, туку повеќе се заинтересирани за економскиот развој и интеграцијата во ЕУ.

Интересно беше претставена приказната за винарската визба „Попова кула“ и сопственикот Јован Трајков, кој својата инспирација за отворање винарска визба ја нашол при посетата на лозјата во Напа, Калифорнија. Трајков преку разговорот истакна дека се раководени од принципот за глокализација (кованица од глобално и локално, заб.) и постојано работат на промоција на македонските вина на светскиот пазар, а преку тоа и на винскиот туризам преку идејата за винските патишта во државава.

Ова се само првите чекори од еднонеделната репортажа што ќе ги опфати сите скриени туристички бисери на државата, но и технолошкиот развој и инвестицискиот потенцијал на Македонија. Ќе бидат интервјуирани моментално присутните странски инвеститори во државата и нивните приказни, профил за Мајка Тереза, културниот и забавниот живот, како и репортажа од Охрид која ќе се осврне на природните убавини што ги нуди и старата, шармантна архитектура привлечна и за домашните и за странските туристи.

Македонија е четвртата држава, која се наоѓа пред камерите на емисијата „и-лист“, а македонскиот серијал е финансиран од домашната Агенција за странски инвестиции која повеќе од 2 години има рекламни спотови за државата на оваа мрежа. Како што велат од Си-Ен-Ен оваа емисија има за цел да ги предизвика перцепциите кои гледачите ги имаат за места кои им се веќе познати и да ги запознае со локации кои за нив се' уште се неоткриена мистерија. Досега вакви емисии има за Франција, Бахреин и Грузија.