Претходен број

Платите ќе ја проголтаат речиси цела здравствена каса

Платите на вработените во здравството достигнале дури 78 отсто од приходите во фондовската каса

Јасмина Јовановска

Платите на здравствените работници ќе ја проголтаат речиси цела здравствена каса. Месечните приходи на здравствениот кадар во последните неколку години толку пораснале што веќе заземаат околу 80 отсто од парите што се слеваат во Здравствениот фонд. Оттука, не треба да зачудува што на болниците и на клиниките им се заканува банкрот, а не е исклучено слична судбина да го снајде и Фондот за здравствено осигурување.

Неофицијалните математики до кои дојде „Утрински весник“ говорат дека за исплата на платите на вработените во здравството се трошат дури 78 отсто од масата на парите која се слева во здравствената каса. Толку висок процент од здравствениот колач да оди само за платите дошло по неколкукратните зголемување на платите на здравствените работници за по 10 отсто. Пред покачувањата, кои беа еден вид компензација за непочитување на Колективниот договор, платите зеле само 35 отсто од фондовската каса. По првото покачување, кое здравствените работници го добија пред заминување на претходната власт, платите се покачија за 10 отсто. Со покачувањето од сегашната власт, платите во здравството се зголемија на два пати по 10 отсто. Последното покачување е со бруто-платата, и тоа за 12 отсто.

Ако се знае дека во фондовската каса се слеваат околу 320 милиони евра, тогаш значи дека околу 250 милиони евра се трошат за платите во здравството. Овој процент на пари што се издвојува за платите е поголем дури и од Словенија, коментираат доброупатени извори. Во Словенија платите заземаат околу 65 отсто од фондовските пари. Но, во Словенија буџетот на здравството е над две милијарди евра.

Овој процент можеби малку ќе се намали, посебно што дознаваме дека Синдикатот и Министерството за здравство преговараат околу дежурствата кои со бруто-концептот, исто така, беа вметнати во платата и ги покачија платите.

Ако кон ова се додаде дека голем дел од вработените ги тужат установите каде што работат поради непочитување на Колективниот договор, тогаш банкротот на болниците и на Фондот можеби е неи��бежен. Дел од вработените од клиниките што тужеле поради непочитување на Колективниот договор добиле, така што Фондот треба да исплати околу пет милиони денари. Доколку вака постапат сите здравствени установи, на Фондот не му бега банкрот.

Во Фондот за здравствено осигурување потврдија дека процентот на платите веќе достигнал до 78 отсто. И за фондовското раководство овој процент е преголем залак и не знае како да го реши, па затоа бара решение и од Владата.

Директорот на Фондот, Ѓорѓи Тренкоски, смета дека ФЗО како фонд ќе се спаси од банкрот. Ќе се штеди на одредени набавки. Но, според него, секако, проблем ќе им биде на клиниките и на болниците, а најмногу ќе настрадаат здравствените домови. Посебно откако се воведе ДРГ-системот на плаќање. Тие немаат некои посебни услуги и нема од каде да се финансираат.

„Болниците и клиниките може да испливаат само со добро менаџирање. А тоа значи дека треба да се штеди на режиски трошоци и онаму каде што има превработеност да се намали бројот на вработени. Се знае дека во последните две години нагло се зголеми бројот на вработените во здравствените установи“, коментира Тренкоски.

Но, бројот на вработени не се зголеми поради тоа што бараат клиниките и болниците. Новите вработувања во здравствените установи или се под партиски притисок или според Рамковен договор или поради реорганизација, како што беше случајот со Клинички центар. Од една установа се формираа 32 установи со исто толку управни одбори, втори менаџери и еден куп комисии за набавки, што повлече, секако, најмалку 200 нови вработувања.