Претходен број

Полицијата фати двајца жители на село Батинци кои заработувале на бизарен начин – препродавајќи расипана храна

Расипано месо, риба, салама, пијалаци и други продукти со изминат рок со месеци нелегално биле изнесувани од скопската депонија Дрисла и завршувале на пазарите, а потоа и на трпезите во неколку скопски села. Аферата за продажба на повеќе од половина тон расипана смрзната риба и месо ја обелодени полицијата, која викендов уапси две лица кои се занимавале со овој сомнителен бизнис. Станува збор за Б.И. (55) и К.Б (64) од селото Батинци, кои одлучиле да заработуваат на најбизарен начин – претурајќи по отпадоците фрлени во депонијата Дрисла. Првиот во полиција демантирал дека е вмешан во бизнисот, тврдејќи дека му носел на пријателот салами за да го храни неговото куче. Вториот, пак, при разговорот со полицијата, ја објаснил шемата за заработка со расипана храна, која можела да биде кобна за животот на граѓаните.

Според полициските сознанија, двајцата уште од мај годинава ја започнале шемата со набавка на прехранбени продукти и пијалаци со изминат рок на траење од депонијата и потоа ги продавале на лица од околината на Скопје. На 17 јули во населбата Драчево, К.Б. бил затечен како пренесува неколку пакети смрзната риба со поминат рок со работна машина за сечење дрва. Тој бил приведен во полициската станица во Драчево, каде што ја разоткрил шемата за заработка. Според неговото тврдење, неговиот партнер Б.И. бил задолжен за набавка на прехранбените продукти, како што се месо, риба, салама и пијалаци од депонијата. Потоа му ги продавал на К.Б., кој пак требало да ги препродава на граѓани од околината на Скопје. Второпријавениот Б.И. полицијата го фатила на 21 јули, на патот за браната „Козјак“, во близина на селото Батинци.

Полициската истрага утврдила дека криминалот започнал да се случува уште во мај годинава кога 300 килограми расипана разновидна риба излегла од Дрисла и завршила во неколку скопски села на продажба. К.Б. ја купил рибата по цена од 13 денари за килограм, односно за 4.000 денари, по потоа постепено ја продавал на непознати лица од Јурумлери, Идризово, Петровец, Трубарево, Шуто Оризари и други населби по цена од 40 до 50 денари за килограм.

Сомнителниот бизнис продолжил и во текот на јуни годинава, кога се проширила палетата на продажба на расипани производи. На менито на двајцата измамници се нашле и расипани салами, виршли и сокови со поминат рок, кои повторно биле продавани во скопските села. Полицијата успеала да ги фати двајцата измамници при обидот да ја продадат последната пратка изнесена од депонијата Дрисла. Станува збор за 300 килограми риба, кој место да биде уништена, повторно било планирано да се врати на трпезите.

Дел од купената риба К.Б. успеал да ја продаде веднаш на лица во Трубарево и во Петровец, а веќе наредниот ден во населбата Драчево бил фатен од полицијата. Сомнителната стока била пронајдена при претрес на неговиот дом, по што таа е предадена на ветеринарните инспектори, кои со решение за поништување на храна, ја уништиле во кругот на депонијата.

„Против двајцата осомничени ќе биде поднесена кривична пријава за производство и пуштање во промет на штетни прехранбени и други продукти. МВР продолжува со истрагата за утврдување на каков начин успевале да ја изнесат храната од депонијата и дали за тоа знаела чуварската служба“, вели Иво Котевски од МВР. (Д.Т.)