Не е доволно кратење од само 100 милиони евра?
Според експертите, ако сака да му помогне на стопанството, власта ќе треба да се откаже од повисока сума со ребалансот
Нина Нинеска-Фиданоска
Парите што ги обезбеди власта со еврообврзницата, 175 милиони евра, се доволни само за следниот еден и пол месец, максимум два месеца. Веќе во септември тие ќе бидат потрошени и тогаш може да се испроблематизира исплатата на плати, социјални трансфери и други издатоци што се финансираат преку државната каса. Затоа, експертите сугерираат дека веќе најдоцна во септември неминовно мора да биде изгласан новиот ребаланс на државниот буџет.
Дали ќе бидат доволни 100 милиони евра кастрење на државните расходи, колку што јавно предложи ексминистерот за финансии, Трајко Славески, непосредно пред напуштањето на министерската функција? Аналитичарите сметаат дека власта сигурно ќе мора да скрати повеќе од оваа сума. Дури, некои размислувања се дека со новата корекција на државната каса ќе треба да се редуцира двојно повисок износ.
„Не е доволно да се скратат само 100 милиони евра ако државата навистина сака да му помогне на стопанството. За тоа да може да опстане во овие кризни времиња, парите треба да останат кај него, а не да му се одземаат и тие да се слеваат во државната каса, па потоа власта да ги распределува како што сака. Инаку, штом поранешниот министер за финансии, Славески, јавно призна дека е потребно кратење на 100 милиони евра, сигурно е дека реалната потреба е многу повисока“, изјави вчера за „Утрински весник“ ексминистерот за финансии Џевдет Хајредини.
Овој аналитичар е на мислење дека „Владата повеќе нема да може да и' продаде на јавноста ново задолжување со камата од 10 проценти, како што го направи тоа со еврообврзницата“, па затоа не може да го избегне ребалансот.
Според Хајредини, претстојниот период Владата ќе го искористи за да размисли од кои непродуктивни расходи треба да се откаже, а кои претходно и' ги ветила на јавноста, односно каде е најбезболно да се пресече за да се намалат буџетските трошоци со новиот ребаланс.
Хајредини смета дека многу од ветените проекти за кои сега, дефинитивно, нема пари ќе бидат поместени во буџетот за 2010 година, што ќе и' послужи на власта како алиби дека не се откажува од нив, туку дека само ги пролонгира за извесен период.
Имено, веќе во септември треба да почне и подготовката за буџетот за следната година, односно министерствата да ги наведат своите потреби за 2010 година. „Владата ќе и' објасни на јавноста дека поради кризата не можела да исполни одредени ветувања, но дека нив сигурно ќе ги планира и оствари со буџетот за 2010 година, со цел да ги одржува очекувањата кај населението“, вели Хајредини.
Инаку, иако јавно не признаваат дека државниот буџет е во критична состојба, министрите на терен ја предупредуваат државната администрација максимално да штеди.
Како што веќе пишуваше „Утрински“, веднаш откако стапил на новата функција, министерот Зоран Ставрески ги собрал на итна средна директорите на сите јавни претпријатија, на фондови и на државните агенции, на која им порачал да се штеди секој денар што може да се заштеди, односно да се скратат сите расходи што не се итни. За сите проекти што се почнати, чуварот на државната каса сугерирал не да се стопираат, но за нив да се издвојуваат минимум можни средства, само колку тие да се одржуваат во живот.
Неофицијално, порака да штедат добиле и амбасадите на Македонија во светот.Тоа значи дека државната каса е прилично испразнета, иако власта јавно промовира смиреност и ги убедува граѓаните дека состојбата е под контрола. (Н.Н.Ф.) |
