Претходен број

Поглед

Учебници под прашалник

Жаклина ХаЏи-Зафирова

Ќе има или не ќе има бесплатни учебници за четвртоодделенците и седмоодделенците навреме оваа учебна година? Или, пак, книгите за овие ученици ќе ја доживеат истата судбина како и оние ланските, кои шестоодделенците ги чекаа со нетрпение, па поради пропустот на државните органи, мораа да ги купуваат дури во второто полугодие?

Четири милиони учебници од оваа есен треба да бидат дистрибуирани во рацете на основците и на средношколците, а од нив 500 илјади примероци ќе бидат сосема нови книги од кои ќе учат четвртоодделенци и седмоодделенци. Но, тие се' уште не се печатат, бидејќи, како што рекоа од Педагошката служба, се чекало мислење по жалби од Второстепената владина комисија. А, тие, пак, се на одмор.

Извисија и авторите на учебници кои се жалат дека нема абер од нивните договори за учебниците за четврто и за седмо одделение, иако само им се најавува дека е прашање на ден кога ќе бидат склучени. А, времето си врви и до почетокот на учебната година има само уште еден месец. Време во кое Министерството треба да склучи договори со авторите, да им ги предаде на издавачката куќа „Просветно дело“, па тие да ги лекторираат, да ги преведат и, на крајот, да ги дадат за печатење...

Лесно е од Министерството да ветуваат рокови и да калкулираат со цифри како една милијарда денари колку што ќе чини проектот бесплатни учебници. Но, дали имаа претстава дека времето за кое треба да ги средат и отпечатат овие ракописи е кусо? Зар не им беа доволни минатогодишните нервози околу учебниците за шестоодделенците, па не ги сфатија како поука за да не им се повторат истите грешки?

Колку повеќе се одолжува овој проект, толку полошо за сите, и за Министерството и за оние што треба да ги подготват учебниците, а најмногу за учениците и за родителите...