Тамара Грнчароска



Владата дипломатски молчи за тоа до каде е исполнувањето на условите за добивање датум за старт на преговорите со ЕУ, само штуро соопштувајќи дека сите институции работат на нивна реализација. На десет дена пред затворањето на извештајот на Европската комисија за напредокот на земјава кон ЕУ, на прашањето дали Македонија ги исполнува критериумите, вицепремиерот за европски прашања, Васко Наумовски, вчера одговори: „Исполнувањето на определниците го цени Европската комисија и ние не би ја презеле нивната улога“.

Наумовски вчера по средбата со претседателот Ѓорге Иванов, на која се разговараше за исполнувањето на критериумите, само кратко информираше дека на средбата со претседателот освен за најновиот напредок на Македонија во рамките на нејзиниот пат кон ЕУ, се задржале на реформите во правосудството и во администрацијата „како два процеса кои ќе се одвиваат во наредниот период и за чиј напредок беа направени определени чекори во изминатиот период“.

Деновиве новоименуваниот специјален претставник на Македонија во ЕУ, Дејан Ѓоршовски, пред да замине за Брисел информираше дека од поголемите работи од осумте определници, засега, незавршени се работите во делот на реформите во државната администрација и „некои други поситни работи“.

Во контекст на определниците, вчера, по редовната средба која странските претставници во земјава ја одржаа со премиерот Никола Груевски, холандската амбасадорка Симоне Филипини информираше дека тие биле брифирани за прогресот околу нивното исполнување, велејќи дека „може јасно да се види оти Владата работи многу за да се завршат работите и тоа засега е најважно“. Прашана дали Македонија ќе добие датум за старт на преговорите со ЕУ оваа година, Филипини кратко одговори: „Тоа не е на мене да одлучам“. „Како што знаете, Македонија има домашна задача што треба да ја заврши“, изјави Филипини, додавајќи дека „се' уште останаа неколку работи што треба да се завршат и останува на Комисијата да предложи, а потоа земјите-членки да реагираат“.

Во пресрет на извештајот од ЕК за земјава и можен датум за преговори, вицепремиерот Наумовски за тоа дали може да се очекува вето од Грција, рече дека „засега сме фокусирани на исполнување на определниците, а прашањето со Грција не е дел од тоа“.