Претседателот на Европската енергетска заедница, ЕЕЗ, Славчо Нејков, вчера оствари средба со вицепремиерот Владимир Пешевски и со претставници на „ЕВН Македонија“, на која се дискутираше за претстојните измени во Законот за енергетика, на што ЕЕЗ и' укажа на Владата кон крајот на јули.

„Ние сме крајно позитивно изненадени и сега сме оптимисти за развојот на настаните. Пред се', Владата покажа многу позитивен став за нашите прашања како и за различните мислења околу некои амандмани во Законот за енергетика. Второ, генерално се забележуваат позитивни, конкретни зафати на Владата. Како што сме информирани, Владата, поточно министерот за економија, Фатмир Бесими, неколку месеци работи на акциониот план за измени во Законот“, посочи Нејков.

Тој додаде дека претставниците на ЕЕЗ биле поканети од страна на Владата да дадат коментар за акциониот план, за кој Пешевски најавил дека Владата би можела да го прифати во наредните неколку седмици. Инаку, планот е во подготвителна верзија, во согласност со европските директиви и со Законот за енергетика.

На вчерашната средба било дискутирано и за евентуалните чекори што би ги презела Регулаторната комисија за енергетика. (М.Т.)