Петнаесет загинати, пет повредени, тројца исчезнати и 50 преживеани по потонувањето на бродот „Илинден“ (16:35)





Охрид, 5 септември (МИА) - Петнаесет загинати, пет повредени, тројца исчезнати и 50 преживеани патници, е билансот од денешното потонување на бродот „Илинден“ во водите на Охридското Езеро во близина на автокампот „Елешац“, потврди министерката за внатрешни работи Гордана Јанкулоска.
На бродот во моментот на несреќата имало 73 патници, повеќето бугарски туристи, иако тој имал дозвола за превоз на максимум 45 лица. Телата на 15-те загинати се пренесени во охридската болница каде што треба да биде извршена обдукција. Лекарите веднаш по несреќата успеале привремено да реанимираат една патничка од настраданите 15, но таа подоцна починала.
Петмината повредени, меѓу кои и капетанот на „Илинден“ 23-годишниот Сотир Филев, се хоспитализирани, а по тројцата исчезнати се трага.
Бродот „Илинден“ потонал за само четири минути, од 10:33 до 10:37 минути.
Според првите изјави на преживеаните од несреќата, кои се сместени во хотелот метропол, „Илинден“ заедно со уште два брода на меѓусебна оддалеченост од стотина метри пловел на редовна линија од Охрид кон Свети Наум. Во еден момент слушнале како нешто пукнало во задниот дел на бродот, по што тој веднаш потонал.
Очевидци тврдат дека бродот потонал за многу картко време, а први помош на патниците им пружиле бродовите „Александрија“ и „Кристина“ кои биле во близина и чија брза интервенција спречила уште поголема трагедија.
- Несреќата се случи околу 11 часот. Ние бевме во глисер, сакавме да се паркираме во Елешец и тогаш од брегот ни викнаа дека има потонат брод. Само што се завртевме видовме како плутаат луѓе. Веднаш заминамвме кон нив, но најмалку десет веќе беа мртви. Неколку преживеани зeмавме во глисерот, а на тројца за кои мислевме дека можеме да ги спасиме, им пруживме прва помош, меѓутоа беше доцна, вели Гордана Рувческа од Кичево.
Еден од преживеаните патници, бугарската државјанка Јорданка Димитрова изјави дека бродот откако се превртел потонал за една секунда. Според неа на бродот имало млади девојки и повозрасни, но не и деца.
На местото на несреќата поладнево пристигнаа претседателот Ѓорге Иванов и премиерот Никола Груевски, а вечерва по повод несреќата Владата на Република Македонија ќе одржи вонредна седница.
Утрешниот ден - 6 септември Владата одлучи да го прогласи за Ден на жалост во Република Македонија.