Дури 52,4 проценти од граѓаните не знаат за кого би гласале или не би поддржале ниту една партија, во случај сега да се одржуваат парламентарни избори. И покрај огромната бројка на неопределени, на тие избори фаворити повторно би биле ВМРО-ДПМНЕ и премиерот Никола Груевски, кои собрале најмногу поени во анкетата што ја реализираше Институтот за демократија од 1 до 3 септември.

Кога утре би имало избори, ВМРО-ДПМНЕ би водела во однос на СДСМ со 24,9 наспроти 9,5 проценти, а ДУИ би извојувала победа во албанскиот блок со поддршка од 7,1 процент, а Нова демократија и ДПА би биле во мртва трка, првите со 2,6 , а вторите со 1,9 отсто. Сите други партии спомнати во анкетите имаа поддршка помала од 1 процент, така што анкетата практично укажува на профилирање на само две релевантни политички опции во македонскиот блок.

Груевски и натаму е политичар кој ужива најголема доверба меѓу граѓаните - 26,1 отсто, иако и во овој случај над 50 проценти од испитаниците немале одговор или, пак, рекле дека не веруваат никому. Груевски води со голема разлика во однос на лидерот на СДСМ, Бранко Црвенковски, за кого се изјасниле 8,5 проценти од анкетираните. Потоа следуваат лидерите од албанскиот блок: Али Ахмети - 6,7 проценти, Имер Селмани - 2,9, Мендух Тачи - 1,4 и Руфи Османи - 1,1 процент.

Ниту една институција не добила поголема оценка од тројка. Странските организации се оценети со 2,96, а потоа се Владата и НВО-секторот, кои се изедначени со просек 2,95. Не заостануваат многу ниту претседателот - со оценка 2,78, Собранието - 2,55, опозицијата - 2,47, а на крај е судството - со просек 2,37.

Во оваа анкета се забележува извесен прогрес во рејтингот на претседателот, ако се има предвид дека на прашањето како се оценува работата на врвните политичари, тој добил повеќе позитивни отколку негативни оценки - 37,6 спрема 33,1 проценти. Од Институтот напоменуваат дека само Груевски и Иванов имаат повеќе позитивни оценки и дека другите политичари предизвикуваат повеќе негативен одиум кај електоратот.

И оваа анкета укажува на силната поддршка од граѓаните за евроатлантското интегрирање на земјава, бидејќи 83,9 односно 83,1 процент од испитаниците се изјасниле дека би гласале „за“ кога би се одржале референдуми за влез на Македонија во ЕУ и во НАТО. (А.М.М.)