Компромис за државните секретари

По три дена жестока и тензична расправа околу амандманите на Законот за државни службеници на вчерашната седница на Комисијата за политички систем и односи меѓу заедниците, пратениците на ВМРО-ДПМНЕ и ДУИ, како и на СДСМ, постигнаа компромис државните секретари во иднина да ги именува Владата. Мандатот на државните секретари завршува со престанување на владиниот мандат, односно со разрешувањето на органот што ги назначил. Со други зборови, државниот секретар и натаму останува политичка фигура иако во првичното решение беше предвидено тој да биде од редот на професионалните кадри.

За попладневната расправа остана уште да се постигне договор околу опфатот на државните службеници, но за ова прашање власта и опозицијата отидоа на дополнителни консултации. Опозиционерите бараат опфатот да не се уредува со посебна уредба на Владата, туку со посебен закон и државните ревизори да бидат изземени од администрацијата.

„Инсистираме додека трае амандманската расправа да го усогласиме опфатот на државните службеници. На амандманот на ВМРО-ДПМНЕ да се додаде дека се изземаат униформираниот дел од полицијата и одбраната и од Државниот завод за ревизија, но и тоа кој може да биде државен службеник да се реши со закон, а не со уредба на Владата“, инсистираше Владо Бучковски од СДСМ.

Силвана Бонева од ВМРО-ДПМНЕ рече дека владејачкото мнозинство досега покажало кооперативност. „Ни треба време за консултации со пратеничката група да го преиначиме амандманот и ваквото решение, а претходно за него се консултиравме со ’Сигма‘. ВМРО-ДПМНЕ досега покажа максимална конструктивност и ги прифативме без малку сите амандмани на опозицијата“, рече Бонева

Роза Топузова-Каревска, незадоволна од тоа што не биле земени предвид нејзините амандмани и амандманите на пратеничката група на ЛДП, демонстративно ја напушти седницата. „Работата на Собранието се претвори во договорна политика и не сакам да бидат заложник. Очекував министерот да види барем еден наш амандман“, луто реагираше Карева по што излезе од салата.

По неа заминаа и пратениците на Нова демократија Флора Кадриу и Абедин Зумбери, кои, исто така, беа незадоволни поради тоа што не им беше прифатен амандманот за правичната застапеност.

Со вчерашното усогласување на ставовите, атмосфера меѓу партиите на мнозинството и на најголемата опозициска партија се сменија, по што се очекува законот за државни службеници да биде донесен со консензус. (Св.У.)