За најдобрите рудари ќе има награди
Иван Бојаџиски
ШТИП - Министерот за економија, Фатмир Бесими, ќе ги наградува најдобрите рудари. До сите позначајни македонски рудници Министерството за економија испрати допис во кој од нивните раководства бара да ги достават имињата на најдобрите рудари. Во писмото се вели дека министерот Фатмир Бесими на 27 август ќе организира прием за највредните рудари од македонските рудници и ќе им врачи пригодни признанија за нивниот ангажман за економскиот просперитет на земјава.
Средбата со најдобрите работници во „Саса“, „Бучим“, „Злетово“, „Тораница“, „Фени“ и некои други рудници министерот за економија ќе ја има по повод 28 Август, Денот на македонските рудари.
Во рудниците овој потег на министерот е примен со големо задоволство.
„Министерот прави потег за почит и со тој чин му дава вистинско значење на трудот на рударите, чија професија е најтешка и се одвива во специфични услови“, изјави Максим Прохоров, директор за инвестиции и развој на „Саса“.
Николајчо Николов, заменик-генерален директор во рудникот за бакар „Бучим“, гестот на министерот Бесими го оценува како мошне пријатно изненадување.
„Три години руската компанија ’Солвеј‘ го менаџира овој рудник и секоја година на 28 август ги наградуваме нашите најдобри работници. Но, кога за такво признание се залага еден министер, тогаш тоа е знак дека некој надлежен во државава силно го цени трудот и му дава посебно значење“, вели Николов.
И во компанијата „Индоминерали и метали“, во чија сопственост се рудниците „Злетово“ и „Тораница“, исклучително го ценат овој потег на министерот Бесими, зашто, како што ни рекоа, идејата доаѓа од првиот човек на нивното ресорно Министерство.
Во компанијата сметаат дека овој чин претставува голема стимулација за рударите кои ќе ги следат своите најдобри колеги.
Токму во рудникот „Злетово“ во Пробиштип ќе се одржи централната прослава на Денот на рударите. Најстариот рудник во Македонија годинава го слави јубилејот 80 години од почетокот на работењето.
„Индоминерали и метали“ ја продолжи поранешната традиција да ги наградува своите најдобри работници. Во двата рудника признание ќе добијат шестмина рудари, флотери и одржувачи, а со признанието следува и награда од по 10.000 денари.
Еден ден порано, пред најдобрите рудари да бидат примени кај министерот за економија, Синдикатот на работниците во индустријата и рударството организира дебата за Законот за бенефициран стаж. Согласно со овој закон, сите рудници имаат обврска да ги утврдат работните места на извршителите, според тежината и сложеноста на работата. Се смета дека рударите треба да имаат бенефициран работен стаж. Досега такви елаборати направиле рудниците „Саса“ и „Бучим“, а во тек на изработка се и во рудниците „Злетово“ и „Тораница“.
Маре Анчева, ге��ерален секретар на овој синдикат, вели дека во спомнатиот закон имало повеќе аномалии во однос на прашањето за бенефицираниот стаж на рударите.
|
