Триста берачи на вишни во Делчево се пожалија на труење
Во очекување на резултатите од анализите на храна, сомнежот паѓа на печурки
Иван Бојаџиски
ШТИП - Околу 300 берачи на вишни ангажирани од делчевската фирма „Рудине“ доцна прексиноќа се пожалија на болки во стомакот по што побарале помош во локалниот Здравствен дом. По прегледот, кај педесетина од нив биле утврдени симптоми на труење, а кај единаесет лица симптомите биле со загрижувачки димензии поради што биле транспортирани во Општата болница во Штип.
Според Епидемиолошкото одделение во Делчево, најголем дел од овие лица немале никакви здравствени тегоби, но кај нив се јавиле откако дел од берачите се пожалиле на големи болки во стомакот. Сомневајќи се на труење од храна, се обратиле во здравствената установа во овој град.
Откако во делчевскиот Здравствен дом било констатирано дека кај единаесет лица биле присутни поизразени симптоми на труење, тие итно биле префрлени во штипската Општа болница. Во првиот момент се посомневале во храната која вечерта околу 20 часот им била сервирана во мензата на „Рудине“ на берачите на вишни, кои за да заработат денар дошле на делчевските плантажи од Струмица, Виница, Радовиш, Кочани, Берово и од Штип. Вечерата се состоела од јајца, пиперки и сирење. Првичниот заклучок на здравствените работници бил дека вечерата не можела да биде причина за труењето. Имено, од истата храна вечерале уште 80 работници кои извршувале други работи во „Рудине“.
Додека во штипската болница не се дојде до сигурен наод за причините за труење, сомневањето паѓа на печурките кои во моментно ги има многу на планината Голак и на Малешевски Планини. Имено, вчерашниот ден бил слободен за берачите на вишни, а голем дел од нив таа поволност ја искористиле за да заминат во планините во потрага по разни шумски плодови. Сепак, за ут��рдување на причините за едно од најмасовните труења во источниот дел од државата, епидемиолозите од Штип зедоа примероци од храната и водата.
Фирмата „Рудине“ своевремено купи дел од поранешниот ЗИК „Сандански“ во Делчево каде што е подигнат еден од најголемите насади на вишни во Македонија. Поради тоа, секоја година оваа фирма ангажира повеќе стотици работници во фазата на берење, но досега таму не се случил ни најмал инцидент. |
