Претходен број

Нимиц го сослушува државниот врв

За Вашингтон прашањето за македонскиот идентитет треба да биде во фокусот

Тамара Грнчароска

Медијаторот во спорот со името Метју Нимиц вчера допатува во Македонија и попладнето ги започна своите средби со македонскиот државен. Прв кој се виде со него вчера беше шефот на дипломатијата, Антонио Милошоски, додека средбите со претседателот Ѓорге Иванов и премиерот Никола Груевски се најавени за денеска.

Македонскиот државен врв и на оваа посета на Нимиц ја продолжува практиката за одделни средби на државниот врв со медијаторот, што во времето кога претседател на државата беше Бранко Црвенковски доведуваше до конфликтни ситуации меѓу државните претставници и понекогаш и контрадикторни информации од посетите на Нимиц.

Грчкиот весник „Катимерини“ вчера ја пренесе изјавата на помошник-државниот секретар на САД за европски и за евроазиски прашања, Филип Гордон, според кого „прашањето за македонскиот идентитет и како овој термин би се употребувал, исто така, треба да биде во фокусот на преговорите за името“. „Катимерини“, пренесувајќи ја изјавата на Гордон, објави дека „во врска со прашањето за името на Македонија, Гордон сугерираше дека преговорите за договор меѓу двете страни, исто така, би требало да се фокусираат на прашањето за ’македонскиот идентитет’ и како може да се користи овој термин“.

Нимиц, во своја изјава во петокот, не прецизираше дали во Македонија, а потоа и во Грција, ќе допатува со нов предлог за името, туку оти ќе бара напорна работа од двете страни во преговорите, бидејќи ако двете страни сериозно се ангажираат, прашањето брзо може да се реши. „Во Скопје ќе ги слушнам внимателно ставовите на македонската страна“, рече Нимиц. И Милошоски пред десетина дена најави дека Нимиц, пред се', доаѓа да го опипа пулсот на македонската стран��, иако неговиот заменик, Зоран Петров, во истиот период изјави дека Нимиц во Скопје ќе допатува со предлог.

По средбата во Женева од пред две недели, која по четири месеци пауза ги рестартираше разговорите меѓу страните во спорот, македонскиот државен врв излезе со став дека позициите на Македонија околу тоа прашање остануваат исти, без конкретно да го соопшти ставот. Изговорот за тоа беше дека „тоа би можело да му наштети на целиот процес“. Во Женева македонската страна настапи со познатиот став, за изнаоѓање разумен компромис што нема да го загрозува македонскиот национален идентитет. Коментарот на македонскиот државен врв за грчките позиции, кои исто така не се обелоденуваат, пак, беше дека „во повеќе сегменти се далеку од компромисни“.

Од Скопје денеска Нимиц ќе отпатува за Атина каде што ќе се сретне само со шефицата на грчката дипломатија, Дора Бакојани, и со преговарачот Адамантиос Василакис.

Нимиц својот последен предлог за решение на спорот, или како што самиот тогаш го нарече сет идеи, го даде на 9 октомври минатата година. Мерките предвидуваа да се задржи уставното име Република Македонија за внатрешна употреба, додека терминот Република Северна Македонија да биде за меѓународните организации и ОН. Предлогот тогаш предвидуваше наместо терминот Македонци, во иднина да се користи терминологијата: граѓани на Република Северна Македонија, пасошите покрај уставното име напишано на кирилица „Република Македонија“ на англиски и на француски да го содржат зборот Република Северна Македонија, а јазикот да се нарекува како „македонски“, а исто така и националноста во пасошите да биде посочена како „македонска“. Македонскиот државен врв го отфрли предлогот како неприфатлив, бидејќи навлегува во прашањето на македонскиот идентитет.

Оваа посета на Нимиц можеби би била и последна пред целиот процес повторно да влезе во мораториум поради одржување на предвремени избори во Грција, наесен. Тоа дека работите се одвиваат во таа насока покажува и одлуката на грчката опозициска партија ПАСОК, која како подготовка за предвремени избори во септември донела одлука од 17 август партијата да влезе во состојба на предизборна готовност. Предвремените избори во Грција со сигурност ќе ги стопираат разговорите на неколку месеци и вообичаено ќе ги засилат националистичките позиции и реторика околу името кај нашиот јужен сосед.