Возење низ град во автобус на приградска линија се плаќа 45 денари
Независно дали ќе се возат во делот на првата зона, односно само неколку станици низ градското подрачје, граѓаните кои ќе се качат во некој од автобусите што сообраќаат на приградските линии, мора да платат цена што важи за втората и за третата зона. Од Јавното сообраќајно претпријатие „Скопје“ објаснуваат дека патникот плаќа 45 денари ако се вози во автобус на која било приградска линија, иако можеби ќе слезе само по две станици, а доколку помине од втората во третата зона, пак, тогаш плаќа 55 денари.
Вака од ЈСП одговараат на реакцијата на граѓани кои се нашле затекнати кога возачот им наплатил 45 денари, иако тие се возеле само низ градското подрачје. Од претпријатието појаснуваат дека е тенденција жителите од градот да ги користат градските автобуси, кои и почесто сообраќаат за разлика, од оние кои се насочени кон селските подрачја.
„Секаде во светот каде што има тарифен систем во јавниот градски собраќај патникот ја плаќа утврдената цена по зони. Кај нас системот е утврден од градските советници и тој мора да се применува. Според него, дури и кога патникот има месечен претплатен билет за градски линии, со него може да се вози само во автобусите во првата зона. За другите зони тој мора да си плати билет по цената која е важечка за втора или за трета зона“, објаснува Иле Георгиевски, директор на техничкиот сектор во ЈСП. (Сн.К.) |
